入行四年，我仲係一名廢柴，幹不出甚麼好事來。不過，我學識咗一個道理——喺工作上，一定要知道自己想要乜。
大學時期，我識咗Alfred，想當年佢係BBA男神，又靚仔又玩得，ocamp、上莊、住hall、年宵全部有玩，系內無人不識，人見人愛，佢擁有一個青春嘅大學生活。佢嘅臉上，總係掛住燦爛嘅笑容。
然而，大學畢業後，呢一個笑容出現得少之又少。
一直以來，Alfred好想入ibank，而且想入好多人夢寐以求嘅Investment Banking Division (IBD)。可惜，佢唔係三大出身，GPA唔高，又冇乜實習經驗，履歷十分遜色。臨近畢業，佢嘅求職之路困難重重，同學開始有offer，佢連面試都冇。好彩，最後佢入到一間港資投行，總算做到IBD。佢鬆一口氣，帶着期待嘅心情，展開新生活。
可惜，呢一份期待好快消失咗。Alfred嘅公司係一間細行，規模、預算不及大行，offer十分一般。Analyst One入職，月薪不足兩萬，冇乜福利，但工作一樣辛苦。
返咗半年工，Alfred由開心分享工作趣事，變成苦苦埋怨公司不足，公司太細冇人識、獎金得兩個月、同事唔夠醒目、辦公室裝修唔靚，總之乜都係差。係，雖然佢做IBD，但佢無法成為理想嘅Analyst。佢試過搵大行IBD，奈何履歷唔好，冇人搵佢面試。
「唉，呢一份工嘅package，仲差過HSBC嘅teller。我想走，但大行IBD唔要我。走去其他division呢，又以後做唔返IBD喎，進退失據。」半年後再見Alfred，佢已經冇咗笑容。
「呢一兩年市道差姐，努力多一陣啦，你得嘅！」我只可以安慰下佢。老實講，佢個情況，想入大行IBD係有啲棘手。
始料不及，再見Alfred，佢嘅笑容再次出現。原來，佢轉咗去一間大行做Compliance。
「吓，你唔係想做IBD㗎咩？點解會去咗Compliance？咁樣好難返IBD㗎喎。」我問。
「冇呀，有一日驚醒咗。其實我想做IBD，我都係要錢、想威，而細行IBD畀唔到我。但係，大行back office，人工兩倍有多，又有大行光環，總好過做細行IBD。咁我諗通咗，又有機會，咪走囉。我好清楚自己想要乜，我不需要IBD，我要錢要威，暫時滿足咗，已經開心咗好多。」
我思考咗一陣，笑住恭喜佢：「又係，如果其他工作可以達到目標，其實冇必要執著係咪IBD，哈哈。」
（如有雷同，實屬不幸）
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼消閒生活 時尚品味
▼投資教室 專題研究
