0
0
Elon Musk自行斬倉保平安(華爾街戰線@杜昇)
(設計圖片)

千錯萬錯都係借錢買Twitter的錯?Tesla小股東咁諗都好正常,甚至可能連Elon Musk自己都知道,Tesla股價跌到一個位係會被追孖展,被逼斬倉。「好消息」係Elon Musk呢輪沽完貨後可以保平安,壞消息係佢可能一早預咗Tesla低見125美元,甚至100美元,而個市幫佢實現緊個最差情境。

睇翻一開始Elon Musk 4月20日話想買Twitter時交出的資金文件,其中一筆125億美元,來自於抵押Tesla股票。貸款成數20%,以Tesla當日收報325.73美元計,Elon Musk擺低1.92億股Tesla就解決問題,大概為4成左右持股,相對輕鬆。

但去到10月27日,Twitter成交時,Tesla跌到225.09美元,令Elon Musk需要2.78億股Tesla,或57%持股,先可以按到該125億美元貸款,開始感受到緩沖位不算多。

最終如果係按照同一份貸款文件的話,合約就寫明日後抵押貸款比(loan to value )升到35%的話,大摩有權打畀Elon Musk叫佢補倉。

Tesla年內至今服價走勢圖

隨住Tesla股價一直向下,以星期三個收市價137.8美元計,抵押貸款比已經升到32.6%,距離觸發margin call的35%,即Tesla跌至125美元左右,只差一點點。

屆時,Elon Musk拎盡全數4.88億股(沽貨前持股總數)畀大摩,抵押比率先可以落返去20%。

同時Tesla係有規定,抵押股票價值上限只能夠去到25%,即Tesla再向下跌穿100美元,Elon Musk就睇怕連Space X都要拎去抵押或者賣。

當然,試過幾乎破產的Elon Musk都無畀呢件事有機會發生,不顧承諾都要沽近75億美元Tesla籌旗,與其畀機會人哋斬倉,索性不如自行了斷拎去填咗條數先,不過同時自我實現咗個危機出嚟,個市不斷去向下試Elon Musk最擔心的情境。

又順帶一提𠴱125億個息率,由最初講緊3.3%,去到今日6.8%都嚟,即使呀馬生點怪聯儲局加息都好,借錢買玩具始終都係佢自己的決定。


更多最新最熱最有用財經金融地產資訊 請即登記成為Finance730會員

歡迎讀者投稿,稿件請投至finance730hk@gmail.com

▼追蹤Finance730 動向 官方網頁

▼緊貼最新市場走勢? Facebook

▼消閒生活 時尚品味? Instagram

▼投資教室 專題研究? YouTube

發佈回覆