呢排《給19歲的我》引嚟好多人討論，見到有位仁兄講自己跟張婉婷導演做咗半年PA得$5,000人工，雞碎咁多。$5,000人兄文章一出，當然又牽起「人講我又講」的情緒，行外人紛紛話「張婉婷刻薄成性」、「張婉婷為求拍攝不擇手段」，喂！睇清楚，$5,000仁兄聲稱自己從來無傾過人工，他嘅出現性質係幫手。
張婉婷導演前PA指控人工半年只有$5,000
電影工業裡資金長期缺乏，一向合作都係你搭我膊頭，我搭你膊頭，無錢收乃等閒事，皆因大家都係幫手。小至劇組梳化服收車馬費，大至主角都可以搭膊頭。幾年前只有3百萬budget淪落人就係一個好例子。當時已為三屆影帝黃秋生選擇以零片酬參演，如果當日佢收片酬，相信大家都睇唔到一套咁優秀嘅電影。
有人話，嗰位仁兄返足半年工喎！首先講清楚佢係返工，定學嘢，有無僱傭關係？電影界依然有師徒制，師傅徒弟唔講錢，只講學幾多，吸收幾多。10年前嘅我曾經做過Tvb嘅劇組小PA，人工$9,000高ATV $1,000。當時心郁郁想學做電影編劇，咁啱大學同學阿姨拍過吓大片，做編劇。OK，即刻叫同學俾個電話號碼我，打過去，用契弟聲R撈。阿姨好爽快：得呀我宜家寫緊個劇本，你有冇興趣上嚟我公司學吓嘢？好，我即刻想應承，但都係問吓人工點計先。阿姨驚訝：學嘢嘛，俾唔到人工你㗎，劇本未有投資者。
結果我無去到阿姨度，但都無唱阿姨點解叫我幫手唔俾錢，係我話想學嘢幫手㗎嘛，阿姨都無錢收，又點俾錢我？
可能你再話返工唔為錢，為咩？留得喺電影界嘅努力嘅人，係帶住萬二分熱誠去參與每個project，如果project無錢，又有義工出現，電影人一定相信義工係真實存在，唔會覺得對方為錢而來，只會覺得對方都好有熱誠。
電影呢行，無錢無budget，拍膊頭捱義氣幫吓手好常見。就算鮮浪潮好好俾機會新人，最多都係10萬資助拍一部短片，10萬資金真係豐儉由人。要喺呢行撈，要一份熱情。我無呢份熱情，需要錢，咁咪轉行囉。
$5,000仁兄收嘅$5,000，性質係人工定獎勵金實在有待商榷。留意返，人工這回事，有僱傭合約嘅情況下出嘅錢，先叫人工。無僱傭合約嗰啲叫搭膊頭、車馬費。$5,000仁兄連價錢都無傾過，令人相信佢係幫手實在不足為奇。有個咁好嘅學師仔，張導完咗個project，寫張$5,000支票鼓勵一吓年輕人，都算不錯罷？
相信電影人都會認同，喺電影業發展時間付出與金錢收穫不一定正比，有job做唔等於有錢收。尋常生意沒有必賺方程式，而電影投資靠的更加是天時、地利、人和，即係運氣。黃子華 20年前拍一蚊雞保鏢只有21萬票房，當年又怎能預視今時今日佢輕輕鬆鬆闖過8千萬票房。當電影project唔知有無得賺，或者根本唔係為賺錢，回報如此不穩定嘅情況下，就算有投資者資金，監製都自然睇住盤數，避免投資者蝕錢，失去下一個合作機會。
如果做完半年嘢先收得$5000，然後投訴個劇組揾笨實，我會輕輕問佢，點解一開始唔傾好條件先開工嘅？大學生都應該知咩叫勞工權益、合理薪酬。如果唔係燈光師、cameraman呢類有器具拎過嚟嘅崗位，其他位置嘅同事揾到嘅錢真係有限，因為香港可以提供俾電影人嘅金錢、養份有限。電影呢個行業真係行得好艱難，能夠行得落去嘅人，都一定有一份堅持。
人人夢想不同，有人為錢，有人為快樂，有人願意有快樂無錢收。同期做PA嘅，10年過去，簡唔中喺電影credit 我都會見到佢哋個名，第二組副導演、第一組副導演，亦都人喺TVB做到編導，更有人做freelance微電影監製。佢哋宜家揾錢唔多但開心，繼續喺夢工場打拼。
在此寄予$5,000仁兄，放眼向前，如果拍戲為錢，就記得同人傾合作時講清楚自己需要，以免重蹈10年前的覆轍。
作者：Sing Chow
（文章觀點來自作者，不代表本網立場。 )
《Finance730》歡迎讀者投稿，文章題材可以是金錢、理財、投資等，文體不限。稿件請投至 finance730hk@gmail.com，附姓名/筆名及聯絡方法。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
