唔知大家個覺唔覺，個市真係靜咗，既然有客想要活動報價，公司都同意可以收平少少，寧願接多單生意嘛！
點知過兩日收到阿客嬲爆爆咁打嚟…
阿客：「妹！唔好見我人好就搵我笨先得㗎！」
晨早流流，咩事先？
阿客：「你食水會唔會太深呀？搞個啟動禮要咁貴？你哋咪又係淘返嚟！」
冤枉呀大人！我哋真係搵廠做㗎！仲要已經收平咗！加上而家只係報價階段，價錢唔啱都真係可以比較下其他公司嘅…
阿客：「咩backdrop呀，裝飾呀，都係淘㗎啫！」
關公妹：「唔係㗎，我哋真係搵production house自己廠做㗎！大件props我哋就真係未試過淘，暫時亦都唔會有呢個嘗試住呀！特別係今次活動都趕趕地，我哋唔建議呀！」
時間咁少，梗係要穩陣啦！
阿客：「唔好話我話，你哋都係懶搵啫，一係我俾埋link你？」
我當然係大力反抗啦！啲props我又未用過，有咩冬瓜豆腐我要孭㗎喎！如是者，阿客煩咗我成日氹我幫佢淘，我先唔制！Say no順手俾咗最後通牒佢，如果production唔firm嘅話，做唔切㗎喇！
結果阿客都係堅持淘，話佢公司同事會搞…
想講，淘係好經濟實惠， 特別係細細件嗰啲影相props、擺設等等，但真係要揀！例如之前啲客試過買桌球枱，發現枱腳高度不一，啲桌球自己碌埋一邊；又有客試過淘咗個小露寶（擴音機），每個指令都會普通話廣播「開機」、「關機」、「藍牙模式」等等，仲要喺嘉賓演講嘅時候hang機不斷重複「藍牙連接中」，場面非常尷尬。
相信大家都估到事情嘅發展唔會咁順利啦！活動前三日，阿客打電話嚟問，如果而家即confirm啲production做唔做得切？唔好癲啦！
阿客：「唉，唔同你傾住！而家覆諗下改期定點…」
關公妹：「如果係改，你盡快話俾我聽啦，我都要通知返啲記者同埋賓客改期呀！」
喊出嚟，希望唔好改啦，唔係又白做了！
憑住我尋根究底嘅八卦精神！都係嗰啲啦，size唔係好啱，手工唔係好啱心水！最攞命係有啲簡體字，唔啱branding。
最後？咪就係要俾三倍價錢補返隻鑊，仲要唔係佢哋最鍾意嘅set up…真係賠了夫人又折兵！
👩💼關公妹筆記💼
其實想節省成本我都理解嘅，試下睇開幕禮道具，真係好多幾十蚊開幕儀式嘅道具，小至剪綵，大致打手印發光柱都有！好多好評，睇到我都心思思！雖然係慳錢，但係都要睇返branding match唔match到，對產品有啲咩要求，現成嘢點同訂製嘢比較喎！
【Finance730 專欄作家：關公妹💛 @kwankungmui 】
關公妹，係一名從事公關工作嘅九十後，係一名每日都喺食物鏈最低層打滾嘅終極大打雜。PR唔係萬能，但偏偏好多人以為PR乜嘢都可以變到出嚟，於是就訓練出我今時今日過五關斬六將嘅身手去拆彈，就算紅都面晒，硬著頭皮都一樣頂硬上，各位敬請賜教！
關公妹專欄｜點樣喺低Budget下搞一場Cyber嘅PR活動
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
