話說早排做咗一份Digital Promotion Project嘅Tender，Job scope都係Social Media Management、拍片、SEO、落Ad等大路嘢。估計因為我哋平靚正，結果中咗！Yes！
如常開波，如常落力，最後報告交齊，KPI唔止達標，仲要超標！交晒貨，阿客點頭認證，表示滿意。
正當大家單純地以為今單job順利完成，可以功成身退。2日後收到阿客call，語氣沉重得嚟，有啲唔尋常。
「喂？關公妹，唔係講笑，我會正式向你公司投訴你。」
我個心離一離，腦入面閃過：唔通我email打錯名？唔通廣告落咗錯page？定係佢同我講笑咋？
「吓？發生咩事呀？」
阿客語重心長：「Digital嘢，可能你哋強項，我睇得出用心做，交足功課。但係……點解成個Campaign冇搵KOL呀？咁樣點算完整啫？」
我：「吓？」
佢繼續：「就好似去飲茶，點心紙畫好晒蝦餃燒賣鳳爪咩都有，結果食到最後先發現——冇蝦腸粉！成餐茶咪唔完整囉！做嘢唔係咁虎頭蛇尾㗎女！」
係囉！你唔畫又會無啦啦有？講緊咩呀？
阿客一邊怪責，我即刻在記憶棉內想起你：「KOL方面，我哋開會有提及過optional package，presentation入面都show過幾位合適嘅KOL。但當時你哋話唔需要，因為你哋有相熟KOL朋友handle到，我哋focus喺digital就可以……」阿客你係未訓醒定訓咗失憶棉先？
阿客靜咗三秒：「哦？但你哋係咪要sell多次呢？你哋應該專業判斷到你哋做KOL management會更適合。有時客人say no，其實內心係yes嘅，只係當下要計算budget，又可能嗰刻太多考慮，focus shift咗咁，你明唔明啫？」
我心諗：又要又唔要，你究竟係客人定係情人？
最後唯有笑笑口回應：「收到！唔要即係要嘛，下次吖，下次我sell到你唔好意思拒絕！」
關公妹筆記
跟Tender、Quotation做嘢正常不過！唔通因為覺得效果會更好，Agency就會自掏腰包送俾客咩？太hard sell又怕煩親你，Agency都係提供solution同options，sell完你話咗唔要就梗係唔會再sell啦！工作不是談情，唔好成日諗住要對方估估下，直接啲 而減少誤會啦！
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
