財政司長陳茂波昨日在網誌中總結2025年香港經濟表現，展望2026年，陳茂波料香港經濟可保持良好勢頭。不過前財政司長曾俊華則在社交媒體撰文指，「如果從經濟角度去展望 2026 年，我諗未來一年要走嘅路，仍然會係相當難行…喺前景咁唔明朗嘅情況之下，有時仲聽到啲出奇地「樂觀」嘅言論」。
陳茂波 ：2026 市場普遍預期環球經濟維持溫和擴張
陳茂波網誌提到，本港克服外圍不明朗環境，資產市場改善、資金持續流入、訪港旅客增加，整體出口及固定資本投資表現良好，本地消費亦趨穩，預計全年經濟增長加速至3.2%，略高於年初預測。
陳茂波特別點出股市及樓市價量齊升，為經濟注入強心針。港股連續第二年上升，恒生指數收報25,818點，按年升幅約29%，為2017年以來最佳，在全球主要股市名列前茅。新股集資額按年升逾兩倍，大市交投及上市後融資額亦增約一倍。住宅物業市場持續活躍，寫字樓氣氛改善，私人消費首三季升0.9%，扭轉去年跌勢。
展望2026年，陳茂波料香港經濟可保持良好勢頭。市場普遍預期環球經濟維持溫和擴張，內地及亞洲仍是主要增長引擎，提供重要支撐，預計息率下調更有利營商投資氣氛。明年適逢國家十四五規劃開局，政府將更積極對接國家發展戰略，重點發展金融、創科及貿易三大引擎，發揮香港超級聯繫人及超級增值人角色。
陳茂波強調，政府將高度警惕外圍變數，防範黑天鵝灰犀牛風險，統籌安全與發展，讓香港社會經濟平穩向前。他形容本港經濟連續第三年增長，三頭馬車出口投資消費均有亮眼表現，鞏固市場正向預期。
曾俊華最新社交媒體帖文全文
好多人成日話，當我哋年紀愈大，就會覺得時間過得愈嚟愈快，我都有少少呢種感覺。
回顧即將過去嘅一年，感覺似乎係悲多於喜，可能發生嘅悲劇實在係太沉重啦，已經全面蓋過曾經本來令人喜悅嘅點滴。
如果你問我 2026 年有啲乜嘢展望計劃，我會同你講乜都冇呀，其實到咗人生呢個階段，我已經唔會再為自己設定乜嘢大計，因為我哋實在無法掌握到將來會係點樣，所以我依家係抱住好好活在當下嘅態度，希望多做一啲自己喜歡同有意義嘅事。
不過，如果從經濟角度去展望 2026 年，我諗未來一年要走嘅路，仍然會係相當難行，尤其是地緣政治局勢仍然會相當緊張，日本喺美國撐腰嘅情況之下，佢同國家由外交爭端，引發嘅社會經濟斷絶往還嘅情況，都唔知幾時先至有機會擺平。美國方面，口頭上有時就好似對中國表現友善，但係佢哋嘅對華立場，五時花六時變，所以我哋同佢哋嘅交往，一定要係充滿戒心；其他西方國家，會唔會再聯手圍堵中國，出現現代版嘅八國聯軍呢？雖然形式唔知會係點，但係依家我哋都唔能夠排除呢個可能性，呢啲隨時都會對香港經濟社會造成好大嘅衝擊。
喺前景咁唔明朗嘅情況之下，有時仲聽到啲出奇地「樂觀」嘅言論，話今年香港金融市場點亮麗，新股市場點暢旺，但係我個人可能比較保守審慎喇，當我睇到近日有 4 隻新股喺上市掛牌日，全部跌穿招股價，跌幅仲係一啲都唔細，我就不其然皺一皺眉，點解會出現咁嘅情況呢？係咪有啲工夫做得疏忽，或者做得唔夠呢？
前排證監會同港交所，先至寫信畀啲新股保薦人，話佢哋留意到近期一啲新上市申請嘅質量下滑，以至出現一啲唔合規嘅行為，呢啲都係好值得我哋留意嘅。香港擁有國際金融中心呢個地位，絶對唔係理所當然㗎，呢個位置係靠前人幾十年嘅努力，得來不易，但係好現實嘅係，呢個地位，一唔小心，都可以毀於一旦。喺嚟緊嘅一年，大家都宜謹慎行事，保守一啲都唔係壞事。
不過，喺過去呢一年，喺唔同場合，我都認識咗唔少嚟自不同界別嘅年青人，佢哋雖然明白前景唔係咁明朗，路唔係咁容易行，但係佢哋都係好有意識，希望喺自己嘅範疇，盡力開拓一條適合自己嘅路。我哋要相信佢哋嘅能力，希望喺一啲關鍵時刻，留多啲空間，放手畀呢班下一代發揮所長。
預祝大家，有個燦爛美好嘅 2026 年！
更多香港經濟相關報導
首3季破產創十年新高 失業率3.9%疫後新高 逾15萬人失業
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢 Facebook
▼投資教室 專題研究 YouTube
▼消閒生活 時尚品味 Instagram
