居屋唔係得XX苑？私人參建居屋可能正過私樓

特首李特首李家超喺2022年發表任內第一份《施政報告》嘅時候，講過要推出全新「私人發展商參與興建資助房屋先導計劃」。尋日（8日）就有消息指，政府下星期就會公佈計劃框架，預計會宣佈推出兩塊用地畀發展商投標。

政府未必包底 發展商要諗方法吸引買家入場

消息人士指，有別於以往嘅私人參建計劃，今次政府唔會再「包底」處理賣唔出嘅單位，所以政府會鼓勵發展商諗辦法增加樓盤吸引力，例如相關項目有機會唔係以清水樓形式推售，設計同用料可能都會好過現時嘅居屋。

其實現時除咗房委會有推售居屋之外，房協都有推出附有基本裝修嘅居屋項目，不過折扣率會比房委會居屋低。如果私人發展商參建嘅居屋項目成本較高，可能到時售價都會高於房委會居屋。

私人參建居屋 vs 房委會居屋：外在條件有咩分別？

早喺上世紀70年代，已經有私人發展商參與興建資助房屋，第一個私人參建居屋屋苑油塘中心喺1980年落成。私人參建居屋同房委會居屋喺命名同外形上都有明顯分別，例如房委會居屋一般用「苑」字命名，但私人參建項目嘅屋苑名就比較多元化，譬如屯門嘅龍門居、筲箕灣嘅愛蝶灣，同埋其士集團發展嘅富康花園、富安花園、富榮花園同富健花園等，就咁睇名都未必區分到佢哋係咩類型嘅住宅！

至於外形方面，私人參建居屋以私人樓宇設計為藍本，結構外形五花百門，例如鑽石型、X字型、L字型、T字型等，同傳統嘅房委會居屋都唔太似樣。

過往私人參建居屋「筍盤」 價錢質素拍得住私樓

📍康山花園——港島港鐵站上蓋 同私樓共用會所

由恆隆、新世界、港鐵等企業合組嘅財團「Headstar Limited」發展嘅康山花園位於東區鰂魚涌，係康怡花園發展計劃嘅第二期。雖然樓齡已經超過35年，但康山花園到依家都仲係好搶手。喺過去一年，康山花園有單位試過以$1,000萬成交，幾乎要成$17,000一呎，呢個價錢直頭同「十大藍籌私人屋苑」康怡花園有得揮！

不過康山花園賣咁貴係有佢嘅道理——佢「貴」為全港唯一一個「站上蓋」私人機構參建居屋計劃屋苑，起喺港島線太古站上面，交通配套齊全，而且住戶可以申請加入康怡花園俱樂部，享用戶外泳池、健身室、網球場、兒童遊樂場等設施，同住私人屋苑冇咩分別，呢個質素確實對得住佢嘅價錢。

📍愛蝶灣——位於港鐵站旁邊 部分單位睇到無敵海景

由周大福附屬公司金冕發展嘅愛蝶灣位於筲箕灣，個名除咗特別之外，仲要一聽就知係一個近海屋苑。雖然唔係個個單位都可以望到海景，同埋部分單位只可以睇到少少海景，但第9同第10座A至D中高層單位嘅住戶係可以欣賞到一個無遮無擋嘅完整海景！唔止景觀吸引，愛蝶灣嘅位置都非常就腳，一行出筲箕灣站D2出口就已經係愛蝶灣1座，就算係私樓都未必有佢咁方便。

📍富榮花園——九龍居屋王 史上首個售價破千萬居屋單位

由其士國際發展嘅富榮花園位於大角咀，處於荃灣線、觀塘線及東涌線中間，唔單止地段好，仲要校網都靚，區內有DGS、真光、九華等Band 1學校，所以富榮花園一直都係九龍區最受歡迎嘅居屋屋苑之一。

喺2018年，富榮花園17座嘅一個中層單位以$1,065萬喺自由市場售出，呎價接近$18,000一呎，成為全港第一間千萬居屋王。$18,000一呎係咩概念？睇返隔籬私人屋苑柏景灣近三年成交，部分單位呎價大約都係$17,000至$18,000……今年三月仲有個柏景灣2期3座單位以$968萬成交，平均呎價只係$16,214。當初千萬居屋王嘅價錢放喺依家嚟講，夠買一街之隔嘅私樓喇。

更多最新最熱最有用財經金融地產資訊 請即登記成為Finance730會員

歡迎讀者投稿，稿件請投至finance730hk@gmail.com

▼追蹤Finance730 動向 官方網頁

▼緊貼最新市場走勢 Facebook

▼投資教室 專題研究 YouTube

▼消閒生活 時尚品味 Instagram