騰訊、網易等大陸遊戲廠商喺尋日（29日）共同發佈「關於暑期未成年人遊戲限玩的通知」，宣佈未成年用戶喺暑假（7月1日至8月31日）期間，只可以喺星期五、六、日夜晚8點至9點登錄打機，即係話喺暑假呢兩個月入面，未成年人加埋淨係玩到26個鐘嘅網絡遊戲……
其實內地早喺2019年已經推出咗「限玩令」，為咗防止未成年人沉迷網絡遊戲，政府規定中國所有網絡遊戲公司唔可以喺每日夜晚10點至早上8點期間為未成年玩家提供服務，提供服務嘅時長亦有限制，節假日唔可以超過3個鐘，其他日子就唔可以超過1.5個鐘。
到咗2021年，中國進一步收緊相關規定，所有網絡遊戲企業只可以喺星期五、星期六、星期日同法定節假日嘅夜晚8點至9點，為未成年人提供1小時服務。根據伽馬數據發佈嘅《2022中國遊戲產業未成年人保護進展報告》，超過七成未成年人嘅每週遊戲時長唔多於3小時，反映當局嘅措施「成功」令未成年人遠離網絡遊戲呢種「精神鴉片」。
遊戲廠商：用AI技術識別未成年玩家
其實呢啲措施，不嬲都係「上有政策、下有對策」，點都會有人嘗試諗辦法避過監管，例如小朋友可能借屋企人嘅電話同帳號打機，遊戲公司點都冇可能手動check哂每一個玩家過咗18歲未。針對冒用帳號問題，網易喺發佈暑假限玩通知嘅時候提到，佢哋會派出24小時無休嘅AI巡邏員，負責識別及監管未成年用戶，干預同攔截不理性消費，以及打擊有害信息、淨化網絡。
騰訊遊戲就喺微博發佈咗一張通知截圖，如果系統認為玩家帳號正在由未成年人使用，會要求用戶完成人臉識別，只有通過驗證嘅用戶先可以繼續使用。相信內地嘅小朋友，一定會有一個難忘嘅暑假……
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
