近日內地一名從事科技行業嘅39歲女子向傳媒反映，由於學信網（中國高等教育學生信息網）將佢嘅學歷記錯做「結業」，導致本來係正常「畢業」嘅佢喺轉工嗰時無法通過新公司嘅審核，白白失去咗一份年薪20萬嘅工作，仲為此失業半年，於是佢決定起訴母校，要求學校賠償佢嘅損失。
畢業生被貶為結業生 求職過程遇阻滯
學信網由中國教育部學生服務與素質發展中心主辦，係一個可以畀學生、畢業生同企業查詢學歷、學籍等資訊嘅平台，求職招聘、升學留學、幹部任免同信用評估都有機會用到學信網嘅資料。
一個咁重要嘅網站，資料出錯真係可大可小。化名張倩嘅當事人表示，佢上年轉新工嗰時發現學信網顯示佢係「結業」而唔係「畢業」，導致佢最後過唔到新公司嘅入職審核。奇就奇在張倩明明揸住學校頒發畀佢嘅畢業證，屬於正常畢業，冇理由無端端變結業㗎。之後張倩聯絡其他大學同學，發現佢哋都遇到同樣嘅問題，應該係當初人手入資料嘅時候出錯，先搞到佢哋全部變成結業生。
畢業同結業只係一字之差，但只有達唔到專業畢業要求嘅學生先會拎唔到畢業證書，所以畢業生同結業生求職時嘅待遇都差好遠，張倩嘅入職流程亦因此被新公司停止。就算佢想再搵第二份工，多數科技企業都會要求佢先提供學信網嘅資料，於是張倩唯有暫停求職，諗辦法申請修改返學信網嘅學歷資料。
用4個月修正資料 賠了offer又失業
改資料嘅過程非常複雜，首先要去人力資源和社會保障局調閱檔案，又要搵學校填寫申請資料，相關資料被教育委員會彈返轉頭，寒假期間學校又冇人理佢……由2022年11月發現資料出錯，去到今年2月底終於改返啱自己嘅學歷，張倩前前後後搞咗差唔多4個月，原本間公司當然唔會再等佢。去到今年6月，張倩先搵到第二份新工。
失業半年，仲要冇咗個年薪20萬嘅offer，張倩嬲到將母校上海印刷出版高等專科學校告上法庭，理由係學校喺學信網登記咗錯誤嘅畢業信息，張倩為咗申訴修正資料而失業，其後多次請求校方支付經濟損失未果，要求校方賠償半年工資收入損失10萬元，以及半年五險一金（養老保險、醫療保險、工傷保險、失業保險、生育保險及住房公積金）損失2萬元。
校方拒絕負責：係市場環境同事主個人原因導致佢失業
張倩表示，學校喺庭上承認搞錯咗註冊信息，亦承認因為流程複雜導致用咗四個月先改到資料，但拒絕為張倩搵唔到工呢件事負責，校方認為佢大可以用紙本畢業證書求職，求職失敗係張倩嘅個人原因、工作能力及市場環境造成嘅。校方回應時就話學校無法控制學信網，佢哋仲要上報資料，所以修改流程較長。
有關新聞登上咗內地微博熱搜榜，不過部分網民討論嘅重點反而係張倩嘅人工。「大專畢業都能找到年薪20萬的工作，身邊很多專科生一個月也就拿五、六千的工資。」「專科都能年薪20萬，985、211畢業生月入過萬了嗎？」亦有網民提出應該要有機構監管高校行政工作，僱主亦唔應該只睇學信網資訊，甚至連紙本畢業證書都唔認可。
🎓Finance730 x FM財自 首個聯合舉辦講座《財自學院》
有猛人講者 基金經理黃國英 公開最新第四季焦點板塊及投資策略📈
7月31日前報名💰可享早鳥優惠（HK$300）
仲可以同英Sir現場交流🗣
8月19日 英Sir駕到👉https://finance730.com.hk/shop/
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
