意大利國防部長克羅塞托（Guido Crosetto）日前接受意大利媒體訪問時表示，意大利四年前加入中國一帶一路倡議係一個即興同糟糕嘅決定（”improvised and atrocious” decision），呢個決定增加咗中國對意大利嘅出口，但冇為意大利對中國嘅出口帶嚟同樣影響。
克羅塞托之後補充：「依家個問題係，點樣喺唔損害意大利同北京關係嘅前提下退出一帶一路，因為中國確實係一個競爭對手，不過都係一個合作夥伴。」
意大利總理梅洛尼（Giorgia Meloni）上星期四喺同美國總統拜登（Joe Biden）會面後表示，意大利政府仍然評估緊會唔會繼續參與一帶一路倡議，並宣佈會喺近期訪華。梅洛尼之後再喺採訪中提到，意大利會喺12月之前作出決定，但仲需要同中國政府及意大利議會討論。
一帶一路真係可以扭轉發展中國家命運？
今年係一帶一路倡議提出十週年，原本係想通過建設大量基礎設施去重建絲綢之路，實現「加強區域互聯互通，擁抱更美好的未來」嘅偉大願景。不過有人批評中國作為發起人，只係想藉此擴大其地緣政治同經濟影響力。
截至今年6月，已經有超過150個國家加入成為一帶一路共建國家，但歐美大國中只有意大利喺2019年入會，成為唯一一個加入一帶一路嘅七大工業國集團（G7）成員國，其餘一帶一路成員以發展中國家為主，當中有超過50個成員都係非洲國家。
如果意大利冇得益，咁參與一帶一路嘅發展中國家又有冇受惠呢？據《日經亞洲》報道，一帶一路成員國巴基斯坦喺今個月「全力以赴」慶祝中巴經濟走廊（CPEC）十週年，仲稱CPEC為南亞國家嘅勝利，不過實情係當地多個CPEC項目受延誤影響仲未完工，巴基斯坦亦無法向中國電力供應商支付維持工廠營運嘅費用，有當地商人更表示自己從來冇喺CPEC項目中獲得任何生意，因為所有材料都係向中國企業購買。
歐洲領導人將缺席一帶一路峰會 可能得普京捧場出席
除咗意大利準備縮沙之外，今年一帶一路可能仲要面對另一個壞消息——目前歐洲多國領袖都表示會缺席中國喺10月舉辦嘅「一帶一路國際合作高峰論壇」。《華爾街日報》報道，法國、德國、意大利、希臘同捷克領導人都講明冇計劃出席論壇，瑞士外交部發言人就話仲考慮緊。個個國家都唔去，到時可能就要靠已經表明有意出席論壇嘅俄羅斯總統普京充撐場面喇。
🎓Finance730 x FM財自 首個聯合舉辦講座《財自學院》
有猛人講者 基金經理黃國英 公開最新第四季焦點板塊及投資策略📈
7月31日前報名💰可享早鳥優惠（HK$300）
仲可以同英Sir現場交流🗣
8月19日 英Sir駕到👉https://finance730.com.hk/shop/
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
