正所謂「唔怕生壞命，最怕改壞名」，唔少人會花重金改名轉運，但有冇聽過有人會為咗自己嘅運勢而「勸說」其他人改名呢？有傳中國山東綠地泉控股集團董事長劉民（劉岷）因為篤信風水命理，所以唔止搵咗「大師」幫自己改個新名，仲要求部分員工喺工作時都要使用一個同公司「夾」嘅好名。
老細帶頭改名轉運
綠地泉公司嘅業務以房地產開發、商品房銷售、工業與民用建築工程施工為主。根據綠地泉嘅工商登記信息，集團法定代表人為「劉民」；不過喺綠地泉官方網站嘅「董事長寄語」中，董事長嘅署名係「劉岷」。唔通公司法人同董事長係兩個人？
據《紅星新聞》報導，原來劉民為咗運程同前途，喺大師嘅建議下改名為劉岷，一嚟寓意有靠山，二嚟有咗呢個「山」之後可以更強勢，發展都會越嚟越好。後來無論係公司內部安排定係對外宣傳，綠地泉一律使用「劉岷」呢個獲得大師認證嘅好名取代原名「劉民」。
員工會被建議改名
幫自己改名唔算出奇，但有傳劉岷除咗幫自己改名之外，仲要求部分員工都要喺公司活動中使用一個「更好」嘅新名。
據知情人士透露，公司喺幾種情況下會建議員工改名，例如如果要籌備重要活動，劉岷就會搵大師算下負責籌辦嘅同事同活動夾唔夾；仲有成立子公司嘅時候，都要算下新公司領導層嘅姓名會唔會同劉岷或者公司相沖。
經《紅星新聞》查證，綠地泉最少有5名員工曾經對外使用改過嘅新名。有人係喺原名中嘅其中一個字上加個偏旁，換成相似嘅同音字，亦有人係將原名嘅兩個字全部換成同音嘅新名。
姓名真係會影響事業仕途
有曾經改過名嘅員工表示，佢自己本身都相信風水命理，恰逢綠地泉要成立新公司，所以大師就算下呢名員工同新公司夾唔夾，最後大師話佢個名要換成另外兩個字，改完之後對佢自己同對公司都會有好處，於是佢就聽從建議改名，但呢個名只係會喺公司工作時使用。
咁如果冇接受大師嘅提議呢？一名綠地泉員工透露，自己本來係受邀到綠地泉工作，大師事前已經算過佢同董事長嘅八字，佢喺入職後被要求改名，不過佢因為覺得個名唔好聽而拒絕咗，後來佢喺公司就逐漸被邊緣化。
有綠地泉嘅退休高層表示，自己之前同劉岷嘅關係唔錯，但佢後來聽講呢段「友情」只係源於自己個名旺劉岷；佢仲話曾經有同事因為個名對劉岷唔好而被疏遠。對於改名呢個傳聞，佢話其實全公司都知有呢件事。公司有時表達得比較隱晦，淨係話改名有利於員工健康同生活。《紅星新聞》曾嘗試聯絡綠地泉同劉岷求證，不過工作人員表示：「沒有這回事，不方便接受採訪。」劉岷就未有回覆。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
