內地青年失業問題嚴重，官方甚至喺青年失業率創出歷史新高後宣布暫停公布數據。好多人搵唔到工嘅同時，內地居然出現咗一班同時入職多間公司、袋住幾份人工嘅專業騙薪族。喺呢個「就業難」嘅時代，呢班騙薪族彷彿活喺平行時空，唔止有工返，甚至有錢到買得起別墅。最近破獲嘅一宗騙薪案件，一個騙薪族竟然同時返緊16份工，被捕時仲要面試見緊新工，堪稱「時間管理大師」。
身兼多職 見工扮係見客
《新民晚報》報導，騙薪族管悅（化名）同時就職於16間公司，每個月有16個僱主出糧畀佢。佢打住「見客」嘅旗號喺出面見工或者揼波鐘，除咗開例會之外都唔會返呢16間公司打卡。有時佢喺出面見新工，仲會順手影張相放上公司群組，同唔同公司嘅同事講自己又見緊客。為咗交足戲，管悅更會用A4紙記低每間公司嘅入職時間同職位等資料。
其他人忙住返工，管悅同老公兼同夥就忙住見工。有時offer太多，佢哋甚至會賣啲工作機會畀同行，然後從中抽成。短短三年，管悅兩公婆已經賺夠錢喺上海寶山買別墅，不過佢哋拒絕就此收手，唔願意放棄任何一個招聘機會，喺管悅被捕嗰一刻，佢仲喺新公司見緊新工，「敬業」程度令人咋舌。
騙徒團隊一齊白逗糧
上年10月，上海一間網絡科技公司聘請咗楊洪（化名）同另外七個人加入市場營銷團隊。呢班「精英」嘅CV非常亮眼，例如曾經喺大型企業工作、參與過「大廠」項目，而且手上有一堆「優質客戶」。考慮到佢哋戰績輝煌，公司負責人劉健（化名）慷慨地為楊洪開出底薪20,000元（人民幣，下同）嘅offer，而其他人嘅底薪大概喺8,000至9,000元之間，另外仲有銷售佣金。
不過呢八個人同管悅一樣，入職後毫無作為，既冇任何業績，項目又冇進展，公司唯有辭退呢班冗員，但佢哋似乎早有準備，仲要求公司必須支付全部薪水，公司最後唯有無奈妥協。
僱主無法追究
喺上海，仲有好多僱主遇到過好似管悅、楊洪咁嘅員工，佢哋有懷疑過呢班人企圖騙薪，奈何手上冇任何證據，就算報警都只會被視為勞資糾紛。如果僱主尋求勞動仲裁，作為勞方嘅騙薪族可能更有優勢，加上同行之間會互相分享應對仲裁嘅經驗，令騙薪族更加有恃無恐。以管悅老公為例，佢曾經打過13次仲裁官司，最後全部勝訴。企業同HR無計可施，只可以盡量同其他公司合作，列出一張黑名單去抵制騙薪族。不過楊洪嘅一次手殘，就令前僱主劉健掌握到佢行騙嘅證據。
誤發離職證明令僱主起疑
楊洪離職後冇退出到公司群組，有一日佢唔小心喺群組入面分享咗一份自己嘅離職證明。呢份離職證明係由另一間公司發出，而上面所寫嘅工作時期居然同楊洪喺劉健公司工作嘅時間重疊。劉健即刻聯絡呢間公司核實，之後先知道楊洪等人居然同時入職兩間公司、袋咗兩份人工，於是劉健立即向警方報案。
騙徒手法層出不窮
警方由資金流入手，發現喺過去三年間，楊洪嘅多個銀行帳戶每個月都會收到好幾筆資金，當中大部份係嚟自唔同公司嘅財務部門，備註都係寫住「工資」，金額由幾千去到幾萬元不等，涉及過百間公司。警方以此為案件突破口，最後拘捕53名犯罪嫌疑人，案件牽涉到嘅金額超過5000萬元。調查後發現，有受害嘅公司曾經招募過超過80名騙子，更有騙徒試過派出「臥底」加入公司HR部門，再由臥底「招募」騙徒及同夥進入公司。騙薪族亦唔係上海獨有產物，有被捕嘅騙薪族只喺上海入職過兩間公司，但喺北京有超過150間公司嘅出糧紀錄。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
