印尼首都雅加達嘅空氣污染已經惡化到危險水平，總統佐科維多多更因為空氣太差，連續咳咗幾個禮拜。眼見問題嚴峻，加上東盟國家領導人即將喺今年9月前往雅加達開會，雅加達政府強制公務員由星期一（8月21日）起必須在家工作，以改善交通擠塞及減少通勤對空氣質素造成嘅負擔。
人口超過1000萬嘅雅加達係全球空氣污染最嚴重嘅城市之一，加上今年印尼嘅旱季較長，令空氣污染問題加劇。空氣品質監測網IQAir數據顯示，雅加達當前嘅PM2.5濃度係世界衛生組織空氣質素指導值嘅16倍以上。
雅加達嘅空氣差到連總統都頂唔順，印尼嘅旅遊與經濟部長上星期證實總統佐科維多多已經連續咳咗幾個星期，病因好有可能係同空氣污染有關。
印尼惡劣嘅空氣質素唔止影響居民健康，仲拖累埋經濟發展。部長表示，空氣污染問題已對印尼造成約21.5兆印尼盾（約110億港元）嘅經濟損失。
為咗改善空氣質素同確保東盟峰會可以順利召開，雅加達臨時州長宣佈由星期一開始，50%嘅公務員將會在家工作，WFH嘅公務員比例會喺9月至10月21日期間逐步提升至75%，但呢項新政策唔會適用於醫院、消防、救援服務同公共交通系統。鄰近東盟峰會會場嘅學校亦將會喺9月開始轉為遙距上課。
除咗強制公務員同學生留喺屋企，印尼政府上星期仲公佈咗其他減輕空氣污染嘅新措施，包括對車輛進行突擊檢查同規定車輛需要定期進行廢氣排放檢查，車輛喺登記許可證前亦必須通過排放測試。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
