自從有咗WFH之後，員工有時喺屋企都可以完成工作，工作同放假之間嘅界線越來越模糊，但員工又有冇義務喺星期六、日做嘢或者覆老細訊息呢？江西某國企領導因為員工喺周末期間冇即時覆機，於是就喺群組公開訓示員工：「千萬不要以為周六周日就是非工作時間」、「薪水是每月給的，不是按22天給的。」
周末唔做嘢 人工要打折？
近日網上流傳多張江西某設計院嘅叮叮（內地企業常用嘅即時通訊軟件）工作群對話截圖。截圖顯示一名溫姓領導喺9月23日（星期六）夜晚十點喺群組中發言：「如果你覺得假期很舒服，應該感謝組織其他人不分晝夜的努力，感謝組織的時候，應該更關係（心）群內的消息，千萬不要以為周六周日就是非工作時間，那可能會跟不上節奏的。」
之後有一名林姓員工回覆領導：「謝謝院部個（各）組織帶給我們的美好生活，以後周末我也會時刻注意群內消息，跟上院裡的節奏。」
雖然員工已經出聲表示會悔改，不過領導似乎並唔滿意，仲話如果員工喺周末使用第二部電話，咁就要取消電話補貼。領導最後補多一段自己嘅感想：「我個人認為，工資是按月給的，不是按22天給的，如果你是按22天上班，那可（按照）22/30來打折扣。這是從經濟方面的思考。」
領導曾當選「勞動模範」
公開資料顯示，呢位溫姓領導全名為溫衍彬，係江西建工第一建築有限責任公司（簡稱江西建工一建）設計院院長。根據江西建工一建喺上年2月發布嘅《關於推薦溫衍彬同志為2022年江西省五一勞動獎章人選的公示》文章，1981年出生嘅溫衍彬喺2017年5月從江西省建工集團設計院調到江西建工一建任設計院院長，仲曾經喺2020年榮獲「南昌市勞動模範」稱號。
睇返溫院長喺群組內嘅發言，字裡行間都充滿對工作嘅熱誠，「勞動模範」呢個榮譽真係實至名歸！
言論焫㷫打工仔 單位急割蓆
不過溫院長嘅敬業精神明顯得唔到網民嘅理解：「這是個人才，但凡讀過一點書，了解一點勞動法都不能說出這種話」、「他還是有基本自覺的，起碼他說了『我個人認為』，他也知道別人跟他認為的不一樣」、「我周末要帶孩子出去散心順道看看父母，你周末還盯著工作是家裡沒有家人嗎？」
溫院長所屬設計院亦發表通報，同院長嘅言論劃清界線：「經查，9月23日（星期六），溫衍彬因佈置的工作任務未得到及時回覆，在設計研究院工作群內發表不當言論，造成不良影響，我司將按照有關規定進行處理。
同時，我們將深刻汲取教訓，進一步加強幹部教育管理，嚴守遵守《勞動合同法》等有關法律法規，切實保障職工權益。感謝社會各界的監督。」
點講好呢……溫院長雖然熱心工作，但連未成年人都獲准喺中秋同國慶假期期間每日打1個鐘機（加埋有成8粒鐘咁多），成年人想喺周末放鬆吓都係人之常情。如果下次有咩事要吩咐下屬嘅，不如留返星期一再講，或者提前同員工交代清楚啦！
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
