成立hkibankmemes三年，最多人提出嘅問題有二。第一，如何入行？相信各位Google一下已有答案。第二，如何認識ibankers？阿晞已經Google過，係搵唔到答案的。於是，我訪問咗一班ibankers，請教佢地如何認識另一半。得到以下三個方法，唔保證一定掂，但可以參考一下。
第一，工作場合。本身，ibankers嘅工作會認識到好多人，可以發展成伴侶。以IBD為例，做一次IPO，要同律師、核數師、客戶團隊合作，過程中要一齊去商務旅行、瘋狂開會，日對夜對，見得仲多過屋企人。所謂日久生情，長期一齊工作，擦出愛火花，真係唔出奇。上年十月，阿晞出席咗一次婚禮，新郎新娘就係合作IPO認識。
第二，交友程式。由於ibankers工作繁忙，冇乜時間社交，想認識另一半，會用更直接嘅方法——玩交友程式。佢地主要玩Coffee Meets Bagel同Bumble，因為兩個程式嘅設計各有心思，適合想認真發展關係嘅人。五位已婚ibankers表示，佢地嘅伴侶正正係交友程式認識！
第三，酒吧。可能呢一行壓力大，好多ibankers都鍾意飲酒。唔止一位ibankers表示，佢地嘅另一半係坐隔離枱，佢地走去搭訕識返嚟的。不過，去酒吧都有技巧，要去多ibankers出沒嘅酒吧。喺九龍工作嘅人，可以去圓方嘅Civic Square，因為Morgan Stanley、Credit Suisse、Deutsche Bank位於隔離ICC。喺港島工作嘅，可以去蘭桂坊、IFC、蘇豪，大部分ibanks位於中環，例如Goldman Sachs同UBS等，佢地嘅員工放工，會去返附近飲酒。
方法主要係呢三個，其他就睇緣份啦。但係，老老實實，建議各位對ibankers唔好有太多幻想。雖然ibankers嘅收入高，但工時極長，冇乜時間拍拖。即使一齊咗，感情生活亦不似預期，好多時係等另一半OT完，陪佢食宵夜。而且，擇偶最重要係價值觀同性格，職業同收入只係其次，與其認識ibankers，不如尋求一位互相欣賞嘅伴侶，一齊成長啦。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
追蹤Finance730 動向 官方網頁
▼緊貼最新市場走勢
▼消閒生活 時尚品味
▼投資教室 專題研究
