相信好多人都知道交友程式陷阱，例如股票女、點數黨、傳銷團。但係，LinkedIn陷阱你又知唔知？
LinkedIn陷阱同交友程式陷阱大同小異。有心人會喺LinkedIn虛構一個好profile，例如Morgan Stanley ECM VP、UBS Sales Director，再主動搵一啲年資淺嘅行內人，話自己條team請緊人，如有興趣，可以直接畀CV佢。受害者提供CV後，有心人會以面試為由，打畀佢傾兩句，甚至約會見面，作出性騷擾。由於受害者交出咗CV，佢地擔心對方會作出進一步行動，而唔敢強硬反抗，只有封鎖對方，息事寧人。同時，因為事情涉及到求職，受害者擔心俾同事知道自己搵工，或俾人取笑自己太急進、傻豬，而唔敢同人講自己中伏。所以，唔少人中過LinkedIn陷阱，但甚少人談及。
要避免LinkedIn陷阱，可以參考以下方法。
第一，小心研究對方profile。收到交友邀請，可以撳入對方profile，睇下佢有幾多朋友，如果只有好少朋友，又冇共同朋友，可能係假用戶。同時，批判性思考佢嘅工作經驗，佢工作過嘅部門是否真實存在？會唔會香港辦公室係冇呢一個部門？如有疑點，要多多提防。
第二，查證對方是否真有其人。當對方話自己任職某大行，可以諗下自己有冇朋友，喺同一間行工作。如果有，可以請朋友用公司內部系統，查下有冇呢一個人。冇嘅話，對方可能係老作。
第三，問對方拎公司電郵地址。假如對方要求你提供CV，可以請佢提供公司電郵地址，再寄畀佢。如果對方只提供個人電郵地址，或堅持要你用LinkedIn提供，就非常可疑。唔係你公司請人咩，點解唔可以寄CV去公司電郵？你畀唔到，係咪因為你根本唔係呢間公司嘅人？大家心照。
騙徒手法層出不窮，以上方法唔可以完全避免LinkedIn阱陷，但係可以減少低級錯誤。投資銀行競爭大，假如有工作機會，當然想爭取一試。但係，爭取同時，記得要小心謹慎，以免CV喺人地手，擔驚受怕呀。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼ 追蹤Finance730 動向 官方網頁
▼緊貼最新市場走勢
▼消閒生活 時尚品味
▼投資教室 專題研究
