「嘩嘩嘩——世界變啦，Pinky竟然做運動呀。」今日約咗師妹Pinky食飯，見到佢一身運動裝，再拎住個網球拍，就知佢打完波嚟。
「唉，攰到爆。」Pinky掟低球拍，一下子攤喺梳化。
「平時叫你行兩步都唔制，乜原來你會做運動㗎？想減肥？」我嘲笑佢。Pinky係出晒名嘅懶人嚟，平日淨係鍾意食好嘢、睇韓劇、做facial，從來唔參與要體力嘅活動，佢去打網球，真係奇蹟嚟。
「收皮啦，我咁瘦，使減肥？我想搵工咋。」佢不屑咁話。
「吓，咁你應該執下CV，搵下headhunter喎。」一時三刻，我諗唔到兩者有咩關係。
「我係要執CV呀，咪就係執Interests嗰行囉！」Pinky好唔高興咁講。
話說，Pinky係大學三年級，正值實習時期。上年搵internship嗰陣，佢鎖定咗一間投資銀行，通過咗多次面試，點知喺臨門一腳，最後一關衰咗。最慘嘅係，佢十分討厭嘅同學John拎到offer，喺佢面前意氣風發，令佢怒火中燒。John仲周圍同人講，佢贏到Pinky，係因為佢份人夠interesting。
當日見到最後一關，MD望一望John份CV，見到興趣係籃球，仲打過一個出名嘅球會，就好感大增。原來MD係籃球迷，有睇開本地籃球比賽，所以二人一拍即合，由練波經歷傾到球會選拔，由球會選拔傾到NBA，John又會講下籃球令佢學識團隊精神、刻苦耐勞，可以用喺呢一份工作上，氹到MD不知幾開心，就係咁，氹咗個offer返嚟。
當然，呢一次John成功，運氣係佔咗一部分，但Pinky亦搵到自己嘅不足，佢的確冇John咁interesting。當日MD問Pinky有咩興趣，佢答旅行，之後就啞咗。頂，旅行，香港人有邊個唔鍾意去旅行呀？你嘅旅行有咩咁特別先？你學到咩可以用喺工作上？你話你鍾意一個人去落後國家，拍下人地啲生活，再營運一個旅行專頁，又唔同講法喎。你可以吹水，話計劃行程、同外國人溝通、營運專頁嘅能力幫到你工作。好可惜，Pinky冇準備到呢一條問題。
唔好以為今次係個別例子。喺投行面試，興趣係非常重要。老老實實，你見工見到第三、四關，大家份CV已經係差唔多，金融知識、工作經驗問得七七八八，去到後期，已經係睇人地鍾唔鍾意你，咁靠咩？遺憾地，靠運氣、靠包裝。運氣冇得講啦，咁大家唯有包裝下自己，包括外表、性格、興趣。所以，興趣好多時係最後關鍵。
「而家你叫我打入球會就冇可能㗎啦，但咁多有錢人鍾意打網球，分分鐘下次我撞到個MD係網球迷呢。」Pinky話。
我唔知打網球可唔可以令佢成功拎到offer，但係可以令佢避免低級錯誤。至少下次人地問佢興趣係咩，佢唔會口啞啞。
如果下次見工，MD問起我有咩興趣，唔知我話鍾意整memes，會唔會有加分呢？哈哈。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼消閒生活 時尚品味
▼投資教室 專題研究
