不怕神一般的對手，只怕豬一般的隊友。Terry入行冇耐，已經領悟到呢一個道理。容我代佢分享一下，佢遇上一位豬隊友Amy的故事。
一個上市項目中，投資銀行係保薦人，主領整個上市項目。過程中，我地會做盡職調查，查下客人是否符合上市資格。例如，我地會訪問客人嘅銀行，查下佢地嘅交易是否真確。
一次，Terry加入一個上市項目，佢要訪問客人嘅十大供應商，查證客人有足夠原材料，支持生產。呢一堆訪問，由Amy安排詳情，製作一份訪問時間表，交畀Terry、律師同核數師，由佢地正式訪問。當時正值疫情，訪問由親身到訪，改為視像會議。
展開訪問了，第一間供應商位於加拿大，晚上八時，大家準時加入會議。良久，對方未有加入，Terry直接打畀對方，無人接聽。大家有啲納悶，律師話：「加拿大而家早上八點，條友會唔會未瞓醒呀？」
Terry話：「可能係掛。唉，不過等多一陣啦，難得佢咁好人，肯就我地早啲起身⋯⋯等等！我收到封email！」
Terry睇一睇封email，係供應商寄嚟，內容話佢收到一個來自香港嘅電話，但明明約咗加拿大時間晚上八點，似乎係佢地搞錯咗，叫佢地按原定時間打嚟。當中，佢仲附上Amy同佢約定時間嘅email。
「頂！真係Amy搞錯，佢約咗人地晚上八點，又同我地講晚上八點，係咪玩嘢呀！」Terry怒火中燒，今次Amy嘅錯誤，唔止浪費咗大家時間，仲令佢地得罪咗客戶嘅供應商！
第二日一早，同第一間供應商完成訪問，Terry、律師、核數師落到printer，活捉Amy，同佢逐個訪問檢查，睇下有冇約錯時間。不出所料，錯漏百出。
「Amy姐，你唔好玩我地啦，你同供應商個email寫住約1400，即係2pm，下午兩點呀，點解你份時間表會寫做4pm㗎？」Terry慌張咁問Amy。
「對唔住囉，睇漏咗。」Amy不屑地回應。
「唉，好彩我地一早發現，改兩點大家可以嗎？」Terry問其他人。
「可以⋯⋯」大家可以改時間，但十分不滿。
「下一個訪問，」Terry繼續check：「呢間供應商喺泰國㗎喎，你同佢地約，有冇講明係香港時間，定泰國時間呀？」
「吓？乜香港同泰國有時差㗎咩？」Amy問。
現場靜咗三秒。Terry接受唔到，Amy唔知時差嘅事實。
「頂！有呀！有時差呀！香港快泰國一個鐘㗎姐姐！你係咪未去過泰國呀？未去過你上網check下都得掛？頂！」Terry控制唔到自己嘅情緒，瘋狂怒吼。現場人士，除咗Amy，無一不陷入崩潰狀況。
冇人接受到，一個咁簡單嘅任務，安排訪問時間表，Amy都可以做唔到。從此，Terry唔敢大意，所有訪問時間表，佢都會check一次。
不怕神一般的對手，只怕豬一般的隊友。留意你的隊友。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼消閒生活 時尚品味
▼投資教室 專題研究
