Eric係我識過最低調嘅ibanker。如果唔係工作上認識佢，我一定唔知佢係一間BB嘅Trader。作為一名極度自大嘅廢柴，佢嘅腳踏實地、謙虛、成熟，絕對係我要學習嘅地方。
仲記得啱啱入行，心入面總有少少優越感，想分享自己嘅工作，話畀人知自己返緊投行。喺Instagram出story？基本啦。落printer要影下堆紙，出businesstrip要影下登機閘口，去listingceremony要同銅鑼合照。總之要話畀人知我係Sponsor！我叻！
但係，Eric從來唔會。佢嘅Instagram從不提起工作，佢亦冇LinkedIn。基本上，你冇可能喺socialmedia知佢返咩工。
工作兩三年後，我依然會提起工作。有時出席同行聚會，大家會傾下事業發展、公司八卦，我必然狂吐苦水，或者分享下花邊新聞。即使唔係同行聚會，有時師弟妹問起工作，我亦會努力回答，或者介紹同行朋友畀佢地。
我呢啲二打六周圍講，Eric作為實力派，反而好少談及工作，更加唔會分享入行心得。同行聚會，大家七嘴八舌傾股市，佢只會搭一兩句。認識新朋友，佢只會話自己返銀行，輕描淡寫職業。
可能你會話：「Eric係毒男，先乜都唔講姐。」非也，工作以外嘅事情，佢絕對冇咁低調，你同佢講足球，佢可以由本地波講到世界盃，你同佢講女，佢可以由IG女神講到AV女優。唯獨是工作，佢極少提起。
我一直唔明，一個健談、開朗嘅人，返緊一份不錯嘅工作，應該要瘋狂showoff先係。點解咁少提及呢？直到上星期，我終於明白。
最近好多大行炒人，一次聚會，有人提及一位同行被炒：「喂，你地知唔知Q俾人炒咗呀？而家冇人搵到佢呀。」
「哈，終於到佢啦？抵死啦。」
「嘩，我真係恭喜佢，一向睇佢唔順眼㗎啦。」
「聽MS啲人講，佢做嘢唔多掂㗎，抵佢俾人炒啦。」
大家你一言我一語，落井下石，真心恐怖。而我，一句說話都唔敢講。因為我預見到，假如我俾人炒，亦會俾人踩多兩腳。現實就係咁殘酷。
後來，我同Eric傾返：「頂，嗰晚個個講人，我真係唔敢出聲，因為我怕下一個係我。」
「係呀，所以平時我好少出聲。」Eric十分平淡：「有時朝早我同同事食完早餐，晏就諗住搵佢食lunch，已經見到佢抱住個箱走咗。唉，呢一行咁易炒人，你真係唔知幾時到自己。平日唔好咁囂張，認叻認威，否則俾人炒咗，真係會跌得好痛。低調啲算。」頂，真。完全講中我嘅缺點。
自此，我明白咗Eric嘅低調。呢一行咁大競爭，又咁殘忍，太高調真係容易出事。平日我有幾囂張，遇到挫折就有幾痛。返得投行，真係唔好招搖過市，做好自己好過。
好似我呢開晒page周圍講嘅，真係好易收皮。恨錯難返呀呀呀呀呀呀呀呀呀——
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼消閒生活 時尚品味
▼投資教室 專題研究
