Nancy畢咗業幾年，仍然未能實現目標，入到大行做front office，佢感到十分氣餒。
Nancy畢業於傳統名校，成績名列前茅，拎過唔少獎項，又係社長。可惜佢喺公開考試失手，三大不入，只可以入讀其他本地大學。即使如此，佢嘅大學生活過得不錯，可以去美國交流，又以一級榮譽畢業，唯一不足係得唔到心儀工作，只可以入一間外資銀行做middle office。
一直以來，佢好努力地拓展人際網絡，不停地認識front office同事，參加mentorship program，去各種行業活動，希望可以搭路去front office。有好幾次，佢真係得到面試機會，亦好努力準備，始終得唔到offer。
一直以來嘅挫折，令佢唔好甘心。後來，佢認識咗Joe，一位Trader兼我嘅朋友。經過多次見面，Joe指出咗Nancy可以改善嘅地方。
「唉，」一次coffee chat，Nancy悶悶不樂：「我做咗一個好不智嘅選擇，我出席咗中同聚會。」
「哈哈，係咪大家開始比較現狀呢？」
「正是，去完真心唏噓。唉，我係名校出身，好多同學入到三大甚至Ivy League，之後平步青雲，做晒醫生律師BB FO，反觀我自己，只係一間second tier做MO，真係好傷心囉。」
「咁你又唔好太灰機，你先畢咗業幾年，仲有得追嘅。」
「唉，要我用到個『追』字，已經好難受。以前我考全級頭十，有個考廿幾三十嘅，而家做緊美資PB，仲撈得掂過我。見完佢，我真係心理唔平衡。」Nancy扁住嘴，直話直說。
「Nancy，你有冇發覺，你成日提住過去？」Joe問。
「吓？有咩？」
「我同你傾過十次偈，有七、八次你會提起以前，話自己係名校、first hon grad、去過幾間BB面試。其實，呢一行大把係名校出身first hon grad再去幾間大行面試啦，你嘅過去並不特別。如果你只係記住以前自己點叻點叻，再比較今昔，就會永遠停留喺中學嗰一個你，唔會進步。」
「唔係㗎，我有好努力搵工、識人㗎。」
「我唔係話你嘅行動有錯，但係你嘅心態有錯。你太重視過去嘅成功，令你接受唔到今日嘅失敗。久而久之，你嘅鬥志會被消磨。所以，放低你嘅過去，由而家呢一刻起，專注現狀，向住目標前進啦。」
Nancy點頭，冇再出聲，二人陷入僵局。
Joe意識到自己可能太harsh，開口緩和下：「嗱，你間中學基督教㗎嘛，實有背金句啦？」
「係呀。」
「我中學又係基督教嘅，咁你一定記得腓立比書嗰句啦？」
「哈哈頂，背到滾瓜爛熟呀。」Nancy笑咗：「我會努力面前㗎啦，多謝Joe。」
「弟兄們，我不是以為自己已經得著了，我只有一件事，就是忘記背後，努力面前的， 向著標竿直跑，要得神在基督耶穌裡從上面召我來得的獎賞。」
腓立比書第三章十三至十四節。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
