上回提到，Joseph第一次去business trip，俾人派咗去江蘇，經歷完山路車程、三星級酒店、旱廁，佢大受打擊，清楚明白business trip唔係好嘢，唔敢再次期待。
半年後，佢加入另一個IPO，再次被派business trip，未收到行程，佢已經十分擔心。
「喂Joseph，你嘅。」同事遞上行程表。
「唉，唔方好嘢。」Joseph無奈地接上行程表，自嘲一下：「今次去吉林定黑龍⋯⋯東京？」
「咪玩啦，個客邊有供應商喺中國呀？」同事笑佢。
Joseph深呼吸，望多一次行程表，目的地真係東京。佢唔敢相信，佢可以去日本。日本喎？佢呢一個少爺仔最鍾意嘅日本喎？平日一年去四次嘅日本喎？真係可以？
呀呀呀呀呀！好開心呀！原來個天係公平㗎！要我去一次江蘇咁慘，原來會送返一次日本畀我！去到東京，我要勁食壽司！一做完嘢要去機舖，夾公仔、玩跳舞機、打太鼓！今晚問下阿媽想要咩手信先！
Joseph心入面咁諗。
可惜，佢太天真。佢太在意目的地，一時之間忘記咗去程、回程呢啲重要資訊。出發前兩日，佢先發現今次係一次one day trip，早機七點去，晚機十一點返。
「吓！咁咪即係要凌晨起身去機場？」Joseph打畀同行律師Ray問。冇錯，今次佢又係同Ray去。
「係呀，仲要晚機返。工作時間仲長過你喺香港返office。」Ray習以為常。
「頂，咁咪蝕咗畀佢。個客咁庹縮㗎，連幫我地book一晚酒店都慳返！」
「唔係客人庹縮，係你老細刻薄。你地Sponsor大佬呀，叫我地出完trip第二日即刻落printer呀，所以我地咪即日來回囉。」
「X佢XX，估到佢唔會咁好死，畀我去日本咁開心，原來即日來回⋯⋯」Joseph嬲豬。
出trip當日，Joseph四點就起身，拖住疲倦嘅身體去機場。上到飛機，附近坐咗一個BB，成程係咁喊，佢完全瞓唔到教。到佢瞓得到啦，又要落機。
一落機，約咗供應商一個鐘後見面，一行人連買咖啡嘅時間都冇，截架的士衝去人地公司，非常狼狽。
「Ray，我已經搵定間好食嘅壽司店，喺兩個目的地中間，一陣我地見完呢個supplier，去食餐好嘅，再去見第二位supplier，唔好蝕畀佢！」Joseph努力搵機會，希望至少可以享受一個鐘。
「去到咪去囉。」Ray依然冇乜期望。而結果證明，冇期望係啱嘅。
去到第一間供應商，接見佢地嘅員工英文奇差，即使Joseph識少少日文，同佢地溝通亦十分困難，預計一小時嘅會面，最後用咗兩小時完成。一搞掂，佢地急急腳咁去下一間供應商。
「頂！食唔到壽司啦！」上返的士，Joseph一肚火。
「下一個目的地有間7-11，去買個便當食囉。」
就係咁，一行專業人士走晒入7-11，匆匆忙忙咁食個便當再工作。
最後一個會面，不出Ray所料，再次超時，令到大家十分趕急，一見完要衝返機場，趕回程機。Joseph估唔到，佢人生可以有一次去日本，係淨係食得一餐，仲要係7-11便當。
「頂，凌晨先落機，我喺香港放工都冇咁遲呀。」飛機上面，Joseph埋怨。
「係呀，唔好唔記得，聽日我地仲要落printer。」Ray戴上眼罩，準備補眠。
「X你XX！！！！！！！！！！」東京天空中，一道哀叫。
Business trip呢啲，永遠可以更差。
【Finance730 專欄作家：林子晞 @hkibankmemes 】
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
