「由我入唔到三大嗰刻開始，我就冇得入ibank⋯⋯」記得一位mentee同我咁講。
係咪入唔到三大，就入唔到ibank？係咪學歷遜色，就永遠翻唔到身？我不太認同。
老實講，如果計啱啱畢業，去爭大行 front office嘅Graduate Analyst嗰下，學歷遜色的確有難度。
但係，工作幾年後，學歷已經唔係首要條件。可否入到ibank，甚至係一啲好嘅職位，主要睇你自己。喺呢一度，送上Mavis嘅勵志故事。
「喂，Mavis！好耐冇見！」早上八時五十分，我喺ICC八樓撞到多年好友Mavis。
「喂，阿晞，你又係喺呢道返工？」多年冇見，我地撞返十分興奮。
「係呀！估唔到咁橋，今日食lunch？」
「好！」就係咁，我地一齊食飯，聚下舊。
我同Mavis傾起近況，知道佢top up degree畢業後，經歷幾年，而家喺一間美資投行做緊middle office。佢嘅人工高過唔少中資、港資嘅front office㗎。我當然要問吓佢嘅心路歷程。
「嗰陣讀完top up，一開始搵工真係好難，只可以做細公司，人工低，亦冇乜career path。掟份CV出去，根本冇人識你間公司，唔會搵你interview。」
「連interview都冇，真係灰機。」
「係呀，之後我先明白，公司名係好重要。所以我去咗上一間公司做back office。佢係一間中資投行，人工加得唔多，但係公司規模好大，至少講個名出嚟，你知佢係邊間先。啲人睇完你份CV，會肯見下你。」
「同意，之後你點轉去現職公司？」
「第二間公司人多，令我得到一啲connection。一位同事走咗之後，知道現職公司請合約員工，仲話係急請，就叫我試吓。好好彩，佢地肯搵我interview。」
「果然識人好過識字，有人介紹，至少有得interview先。」
「係呀，然後又真係過到骨，請咗我喎。我估當時太需要人手，對學歷要求降低咗，就求其請咗我先，哈哈！」
「咁又唔係單靠呢啲，你而家轉到做正式員工，代表你嘅工作表現唔錯，佢地先會convert你啦！」
「唔係啦，做生不如做熟，佢地費事煩先convert我姐。」
「你真係太謙虛。」
「你太過獎就真。我去到咩level，自己心中有數啦，哈哈哈哈哈哈哈哈。」
「理得佢咩，offer已拎，唔好俾人炒咪得。飲杯！」中午時段，唔敢飲酒，兩名上班族乾完杯水，又返上去做嘢。
的確，Mavis嘅學歷遜色。但係，學歷冇摧毀佢嘅事業。憑住努力、人脈、運氣，佢依然得到今日嘅工作。透過努力，佢入到一間中資投行，作為佢嘅踏腳石；透過人脈，佢得到一間美資投行嘅面試機會；透過運氣，佢得到一個合約員工offer，入去爭取表現；最後，再次透過努力，佢可以轉為正式員工。
如果自問學歷遜色，唔好放棄，喺其他方面下功夫，亦可以達到目標。人生係一場馬拉松，上一段跑慢咗，咪呢一段跑快啲，後來居上。
【Finance730 專欄作家：林子晞 @hkibankmemes 】
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
