如果你心愛嘅歌手唔出新歌、唔出新專輯、唔開演唱會，但你又好想聽佢唱歌，咁可以點做呢？AI技術嘅進步，為歌迷打開咗新世界嘅大門，例如AI可以模擬Rihanna翻唱Ariana Grande嘅歌，又可以用Ariana Grande嘅聲線唱Kill Bill……對我哋嚟講，聽AI歌手翻唱可能係一種新奇又有趣嘅體驗；不過對歌手嚟講，AI歌手嘅出現又會唔會為佢哋帶嚟衝擊呢？
「佛系」孫燕姿：凡事皆有可能，凡事皆無所謂，做自己就夠
早前內地網友利用人工智能，模仿新加坡天后孫燕姿獨特嘅音色同唱腔翻唱《愛在西元前》、《髮如雪》同《紅豆》等名曲，部分翻唱作品喺內地影片分享網站bilibili上嘅觀看次數甚至已經超過一百萬次，令「AI孫燕姿」成為網絡熱話。
孫燕姿本人前幾日以《我的AI》為題寫咗篇長文，第一次公開分享自己對AI孫燕姿同AI翻唱嘅睇法。佢喺文章開頭自嘲自己係冷門歌手，話自己嘅AI角色反而成為目前嘅「頂流」：「我想說的是，你跟一個每幾分鐘就推出一張新專輯的人還有什麼好爭的。」
孫燕姿指出，人類一開始堅信唔會被科技取代，但AI即將威脅到人類嘅各種工作，除咗唱歌，仲有法律、醫學、會計等行業。雖然目前可能有人聽得出AI歌手同真實歌手喺情感、音調、呼吸方面嘅差別，不過佢懷疑「這只是一個非常短期內的回應」。最後佢用一句說話總結自己嘅心情：「凡事皆有可能，凡事皆無所謂，我認為思想純淨、做自己，已然足夠。」
環球向AI宣戰 敦促串流音樂平台下架AI生成歌曲
如果AI未經允許就模仿知名歌手翻唱現有歌曲，可能會侵犯創作者同歌手嘅權益，仲有機會影響埋版權公司嘅收入。所以雖然孫燕姿本人好佛系，但佢所屬嘅經紀公司喺回應會唔會起訴AI孫燕姿嘅時候就有保留：「持續看看發展再進一步處理吧，公司目前沒有採取任何行動。」
另一方面，全球三大音樂公司之一嘅環球音樂集團選擇直接對AI歌手「宣戰」。環球喺上個月去信Apple Music及Spotify等串流音樂平台，希望佢哋可以切斷AI對內部音樂嘅訪問權限，防止開發人員用現成歌曲訓練AI模型；環球仲要求平台下架有侵權嫌疑嘅AI生成歌曲，例如上面提到嘅AI版Ariana Grande翻唱Kill Bill影片，因為環球提出嘅版權聲明，所以已經無法再喺YouTube上觀看。如果呢啲AI歌手翻唱嘅歌曲全部被下架，大家又會唔會覺得可惜呢？
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢 Facebook
▼投資教室 專題研究 YouTube
▼消閒生活 時尚品味 Instagram
