作為全港第一間表明容許學生使用ChatGPT嘅大學，香港科技大學（HKUST）比起其他本地大學，已經算係行得好前。但係估唔到科大尋日（29日）又行前多一步，宣佈推出「科大版ChatGPT」（HKUST ChatGPT），由6月1日起開放畀科大師生使用，費用會由校方補貼，科大嘅師生有福了！
雖然ChatGPT嘅存在理應令我哋嘅生活同工作變得更方便、更有效率，不過對學術界嚟講，AI聊天機械人嘅出現就好似一把雙刃劍：如果運用得當，AI可能會為教育同研究帶嚟正面作用，但亦有人擔心學生可能會利用AI技術抄襲或者作弊，例如香港大學（HKU）就已經禁止咗全校所有課堂、作業同考試使用ChatGPT或其他AI工具，除非學生事先獲得相關課程講師嘅書面許可，如果唔係都會被視為「潛在抄襲」行為。
不過科大就選擇從另一個角度去理解ChatGPT嘅意義，科大首席副校長郭毅可尋日向全校師生發電郵，宣佈將會開放試用期暫定為一年嘅HKUST ChatGPT，希望為大學成員提供可以安全使用嘅ChatGPT 3.5。科大版嘅ChatGPT喺Microsoft Azure OpenAI平台上運作，可以確保符合科大網絡安全要求，仲會有加密措施保護用戶喺對話期間分享嘅機密信息。校方會補貼相關費用，每個用戶每月可獲編配約50萬個tokens，每次對話嘅請求提示（prompts）上限為20個。
科大表示HKUST ChatGPT只係短期應對方案，科大成員可以利用呢個機會去累積經驗、探索最好嘅實踐方法同研究新嘅教學法。校方都有提醒各位師生，始終工具本身有局限性，所以用戶使用時最好查核資料真偽（fact-check）。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢 Facebook
▼投資教室 專題研究 YouTube
▼消閒生活 時尚品味 Instagram
