什麼是B仔股？
香港醫療板塊股份有接近200間，其中有50間係B仔。所謂B仔，就係一啲仍然處於硏發階段但未有盈利甚至仍在虧損的生物科技公司。50間B仔，當中有4間已經甩咗B，分別係康方生物（9926），康希諾生物（6185），諾誠健華（9969）同諾輝健康（6606）。
康希諾就唔使講啦，疫情大致上已經過去，疫苗股玩完。康方一向係基金愛股，產品極具概念性，股價已經被炒得很貴。其實大部分做製藥的B仔都有做腫瘤科藥物，目前最流行的兩大腫瘤科藥antibody-drugconjugate（ADC）同bi-specificmonoclonalantibody都很具概念性，較受基金歡迎的做腫瘤科藥物的B仔不少都是主攻這兩種新藥。
至於諾輝健康就比較值得留意，雖然估值唔算平，但佢嘅產品市場巨大，主要係做一啲好簡單，好低入侵性嘅產品去檢測早期的疾病及腫瘤，去年盈利大增，虧損收窄，市值150億B仔來講算係大，嚟緊仲有一啲好强嘅產品推出，盈收大增幾可肯定。
其餘46間B仔大部份都蝕緊錢，暫時有盈利嘅一隻手數得晒，股價跌超過9成嘅很多，絕對係韭菜園，政府大大聲話比B仔上市係要為人類謀福祉，結果係為pre-IPOVC謀了不少福祉，基金同散戶就輸到喊。
半新B仔股勿沾手 禁售期後洗倉風險高
不過50間公司即使有40間執笠，仍然有10間8間，可能都會有些機會。B仔入面，現價高過上市價只有6間，當中有3間係半新股，半新股就千祈唔好掂啦，一過禁售期就被洗倉。
其餘3間唔係半新股而現價又高過上市價的，分別係康諾亞（2162），康寧傑瑞（9966）同以上提及過嘅諾誠健華。頭兩間公司嘅藥產品很具概念性，但係估值亦比較高，諾誠健華於3隻當中估值相對比較低，而且已經有商業化了的有效抗淋巴腫瘤藥產品，去年已經盈收5，6億。
基金鍾意諾誠健華係因為佢個老細施一公夠晒猛料，學術水平接近諾貝爾獎級數。其實呢3間現價比上市價高嘅B仔，亦都係B仔當中市值最大嗰幾間，睇嚟券商都係比較鍾意一啲高市值嘅B仔，覺得佢哋錢多研發成功嘅機會會比較大。
B仔股的選股原則
揀B仔其實有幾個條件，第一就係市值，最好100億以上，第二就係要有好有效好有獨特性或者好有概念性嘅產品，要見到盈利大增虧損減少，如果請到啲重份量嘅醫療專才入董事局就更加好。估值低當然好，但係揀B仔純睇估值未必合適。B仔入面只有10間公司市脹率低於1，當中有8間嘅市值係低於20億，所以低估值嘅公司，通常都係啲細嘅公司，佢哋平好可能係因為券商覺得間公司唔掂，所以冇人投資。
總括嚟講，B仔有危亦有機，投資蝕緊錢嘅公司確實風險好高，但係如果揀到估值合理而增長潛力高嘅B仔，都有一定投資機會。
【Finance730 專欄作家：PPLau】
英國牛津大學醫學科學碩士，曾於香港大學攻讀博士研究及深造衍生工具投資，美國麻省理工學院數碼貨幣深造證書，由醫療專業晉升基金股票投資，特別研究醫療相關股票投資策略
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
