根據瑞士洛桑國際管理發展學院（IMD）最新發佈嘅《2023年世界競爭力年報》，香港今年排名全球第7位，比上年嘅第5位下跌咗兩名。丹麥繼續蟬聯榜首，愛爾蘭嘅排名由上年嘅第11名上升到第2名，緊隨其後嘅係瑞士（第3名）、新加坡（第4名）同荷蘭（第5名）。
【政府：新冠疫情影響香港經濟表現😥】
雖然香港曾經喺2019年登上全球競爭力第2位，但最近四年就一直喺第5同第7位徘徊。睇返四大競爭力因素嘅排名，今年香港繼續喺「政府效率」取得全球第2名，喺「基礎建設」方面都有進步，上升一名至第13位，成績都算唔錯。不過「營商效率」似乎唔再係香港嘅優勢，明明香港喺2019年同2020年仲排喺第2位，但今年就只得第11位，係近年第一次跌出前十，「經濟表現」更由上年嘅第15名大幅下滑至第36名。
至於子因素方面，香港喺「商業法規」繼續排名全球第一，喺「稅務政策」、「國際投資」、「國際貿易」以及「科技基礎設施」亦打入全球前五名。
政府發言人表示，年報肯定香港繼續為全球最具競爭力嘅經濟體之一；新冠疫情上年為香港帶嚟艱鉅挑戰，嚴重影響經濟表現，不過隨住香港復常，恢復與內地同世界各地嘅全面暢順連接，今年香港經濟會有顯著改善。
【台灣排名升至第六📈中日韓排名微跌】
台灣近年嘅競爭力排名keep住上升，由2019年嘅第16名穩定進步到今年嘅第6名，成績仲好過香港。其他東亞地區鄰居嘅表現都比唔上台灣——南韓、日本嘅排名下跌一位，今年分別排喺第28同第35位。
中國競爭力排名全球第21位，雖然表現好過日韓，但係比上年下跌咗四名，係近年成績最差嘅一次；喺四大競爭力因素中，只有基礎建設排名維持不變，其餘三項因素嘅成績都差過上年。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
