內地人氣偶像蔡徐坤被踢爆曾經喺一夜情後強逼對方墮胎，令一班fans同網民大跌眼鏡。正當大家討論緊蔡徐坤會唔會步吳亦凡、李易峰等男星後塵，成為下一個因桃色醜聞被封殺（甚至被判刑）嘅一線明星，有心水清嘅網民發現，呢三位男星竟然都同Prada合作過！最邪係原來仲有好幾位明星喺代言Prada之後都被大陸當局評為「劣跡藝人」，到依家都仲未被解封！成龍被揶揄「品牌殺手」，但似乎Prada個代言人魔咒威力都唔細，一齊睇下有邊啲Prada代言人曾經中招！
💡蔡徐坤——《偶像練習生》第一名 捲入一夜情、墮胎醜聞
內地影音平台愛奇藝喺2018年推出選秀節目《偶像練習生》，雖然呢個節目嘅舞台設計、賽制、選手造型都被質疑係抄襲韓國嘅《Produce 101》，但愛奇藝成功將呢個節目推上內地選秀綜藝嘅巔峰，其中高票出道嘅冠軍蔡徐坤喺節目完結後人氣持續高企，唔止被邀請擔任GIVENCHY、VIVO、Prada、百事可樂等品牌嘅代言人，就連香港杜莎夫人蠟像館都有佢嘅蹤影。
平時一班fans對蔡徐坤嘅評價係清流、敬業、認真、謙遜、專注……點知早兩日就有記者爆料，話佢喺兩年前逼迫一夜情對象墮胎，對方要求蔡徐坤支付500萬人民幣封口費，蔡徐坤就只肯畀50萬，蔡徐坤媽媽仲因為懷疑對方設局敲詐，所以搵人非法跟蹤、監視事主，據傳蔡徐坤母子因此被警方傳喚，之後同事主簽訂咗諒解書，不過蔡徐坤同佢嘅工作室仲未正式回應事件。
【更多明星代言相關報道】
一句對白傷足26年？梁家輝做代言人改口：坐馬自達，不塞車！
姜濤代言啤酒狂吸女性客 單月銷量升三成
戰狼都用美國貨︱中興手機代言人吳京被揭用iPhone
明星代言非萬能 認清顧客投入程度再灑錢(廣告師)
💡吳亦凡——因強姦罪與聚眾淫亂罪判囚13年 大碗寬面變成大碗牢飯
吳亦凡喺2012年以韓國男團EXO成員身份出道，2014年嘅時候提出解約並開始進入中國娛樂圈發展，雖然佢嘅專輯成績曾被質疑造假，上《中國有嘻哈》做導師嗰時又因為係咁問「你有freestyle嗎」而被網民恥笑，但吳亦凡多年嚟人氣始終居高不下，仲先後代言過保時捷、Mercedes-Benz、Louis Vuitton等名牌，亦曾獲邀參加Prada嘅宣傳活動。
喺2021年，有受害者喺網上指控吳亦凡誘姦同性侵未成年少女，擾攘咗一輪之後，吳亦凡媽媽報警聲稱自己個仔被勒索，不過警方介入調查後，反而以涉嫌強姦罪逮捕吳亦凡，最後吳亦凡被判處有期徒刑13年，附加驅逐出境，曾經風光無限嘅韓流巨星淪為階下囚，令人唏噓不已。
💡鄭爽——Prada「期間限定」代言人 涉逃稅、代孕、棄養
90後小花鄭爽曾經出演《一起來看流星雨》、《微微一笑很傾城》等劇集，累積咗大批fans支持。2021年1月，Prada宣佈鄭爽成為新任品牌代言人，但隔咗七日，鄭爽前男友就喺微博大爆鄭爽逃稅、隱婚、搵代母，仲打算棄養當時未出世嘅兩個小朋友，導致鄭爽形象一落千丈，Prada亦喺事件曝光後第二日宣佈終止同鄭爽嘅合作。由Prada宣佈合作到劃清界線，鄭爽呢個代言人淨係做咗8日就收工，被網民稱為「史上最短命代言人」。
💡李易峰——人氣小生因嫖娼被行政拘留
李易峰曾經主演《古劍奇譚》、《盜墓筆記》、《隱秘而偉大》等電視劇，被公認為古裝男神，除咗曾經獲得百花獎、金鷹獎等內地演藝界代表性獎項，仲入選過福布斯中國名人榜。喺2022年9月，北京警方發通告指李易峰因多次嫖娼而被行政拘留。可能因為Prada之前已經有同鄭爽割蓆嘅經驗，所以今次出事反應迅速，喺醜聞爆出後嘅一個鐘內，已經出post宣佈結束同李易峰嘅合作關係。
💡春夏——金像影后遭內地軟封殺
春夏喺2014年首次參演電影，其後憑自己嘅電影處女作《踏血尋梅》成為香港電影金像獎首位以「三級片」獲最佳女主角獎嘅演員，亦係金像獎第一位90後影后。雖然春夏冇好似以上幾個明星咁捲入醜聞，但佢喺2022年11月底轉發聲援白紙運動嘅微博貼文，之後就疑似被內地官方封殺，連微博都被禁言。
最邪嘅一點係，春夏係喺2021年1月同鄭爽、蔡徐坤同時正式成為Prada代言人，而李易峰係喺2021年11月開始代言Prada。依家連蔡徐坤都出埋事，意味住Prada喺2021年搵嘅4個代言人全軍覆沒，無一倖免。有網民調侃Prada，到底呢間公司係唔係偷偷地查咗呢班明星嘅家宅，知道佢哋會出事，所以提前簽約，之後…（講笑啫）。咁究竟下一個會係邊個呢？早前就有傳楊冪正接洽Prada代言。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
