近年內地唔少人投身直播行業，但呢一行僧多粥少，收入又唔穩定，遠比想像中難做。不過四川一名女子成功搵到一份直播界嘅絕世筍工，工作內容就係每日用6個鐘直播打麻雀，可以寓工作於娛樂，攞正牌喺返工時間打牌，月薪更高達3萬人民幣，令內地網民羨慕不已。
嚟自四川成都嘅王女士今年48歲，之前從事文職工作，平時嘅興趣愛好就係打麻雀。早前王女士發現有間網絡公司開出月薪3萬人民幣嘅優厚條件招聘麻雀主播，工作門檻唔高，求職者只需具備麻雀技能同持有麻雀等級證書就得。曾經考獲過麻雀證書嘅王女士覺得自己符合條件，而且呢份工嘅月薪分分鐘仲高過白領階層，於是佢即刻send CV報名，最後成功拎到offer。
王女士表示，佢嘅工作內容就係喺網絡平台上一邊直播打麻雀，一邊同觀眾分享打牌心得，每週工作6日，每日工作6小時。佢非常鍾意呢份工作，因為可以做自己鍾意做嘅嘢，又能夠認識志同道合嘅朋友，仲可以賺錢養家，麻雀水平同知識都得到提升。
老闆：藉網絡平台推廣麻雀藝術
王女士嘅老闆係一位年青嘅創業者，佢之所以想聘請一名麻雀主播，係因為佢認為麻雀喺網絡上有市場同有需求，而且麻雀本身都係一種文化同藝術，所以佢希望通過網絡平台推廣麻雀嘅價值同意義。老闆仲提到，王女士有豐富嘅打麻雀經驗，態度又熱情，係佢心目中嘅理想人選。
網民質疑只係噱頭
王女士嘅求職經歷令網民嘖嘖稱奇，畢竟打麻雀冇可能每鋪都贏錢，但好似王女士咁全職打牌，每個月起碼穩袋三萬元，收入穩定之餘，工作又輕鬆。不過有網民質疑麻雀直播嘅成效，畢竟48歲嘅王女士未必可以吸引年青麻雀玩家睇直播，佢本人亦可能適應唔到直播生態，加上累積人氣都需要時間，冇流量就冇商業價值。有人勸王女士要諗清楚，到底呢份工嘅待遇咁好會唔會只係噱頭，公司又係唔係真係會兌現招聘廣告中嘅承諾。
打麻雀都有得考證書？有機構設立麻雀運動員登記制度
到底王女士求職時拎住嘅嗰張證書係喺邊度嚟嘅呢？據悉，呢張證書係由國際麻雀聯盟及中國棋院杭州分院頒發。呢兩間機構喺上年11月發佈《麻雀運動技術技能等級評定管理辦法》，設立咗麻雀運動員登記制度，規定麻雀運動員技術等級共18級，仲分為業餘同職業兩個層級。麻雀愛好者可以上網答題，成為獲認可嘅麻雀註冊運動員。呢個註冊制度喺推出後大受中國麻雀愛好者歡迎，用嚟註冊同答題嘅微信小程序一度因為有太多人同時登錄，導致伺服器出現問題。
要有證書先可以參加麻雀公開賽
麻雀等級證書唔係淨係用嚟做裝飾品或者紀念品㗎！麻雀運動員喺考獲證書之後，唔單止可以好似王女士咁用呢個專業資格求職，仲可以報名參加麻雀比賽！例如今年3月喺杭州舉行嘅首屆中國麻雀公開賽就對選手嘅麻雀段位有嚴格要求，選手一定要註冊成為麻雀運動員，然後喺網上考獲業餘6段資格，再報名參加麻雀公開賽嘅專業段位定段賽，成功晉級後先會獲得麻雀公開賽嘅參賽資格。截至今年1月，已經有超過200萬人正式註冊成為麻雀運動員。
有猛人講者 基金經理黃國英 公開最新第四季焦點板塊及投資策略📈
即刻報名現場版💰可以同英Sir現場交流🗣
8月19日 英Sir駕到👉https://finance730.com.hk/shop/
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
