《財富》雜誌今個月公佈咗2023年世界500強企業排名，曾經連續4年上榜嘅格力電器今年遺憾名落孫山。格力電器董事長董明珠近日回應落榜一事，表示唔會為此感到難過，仲話「總比爆雷的世界500強好」。巧合嘅係最近捲入債務違約危機嘅碧桂園之前曾多次入選世界500強企業，唔通董明珠口中嘅「爆雷500強」就係講緊碧桂園？
格力電器係中國規模最大嘅大型家用電器及工業設備製造商之一，同海爾智家（6690）、美的集團合稱為中國嘅「家電三巨頭」。自2019年開始，格力電器已經連續4年打入《財富》世界500強，不過4年嚟嘅排名keep住下跌，2019年至2021年嘅名次分別為414名、436名同488名，2022年一度微升至487名，可惜今年都係跌出咗500強。
格力電器董事長董明珠近日喺一個訪談節目中被問到，會唔會為格力落榜感到難過，佢表示：「看到企業這麼健康，我很開心，有什麼好難過的，總比爆雷的世界500強好。」
雖然格力之前曾經係世界500強公司之一，但董明珠依家似乎對「500強」呢個頭銜冇乜興趣，佢話世界500強只係睇銷售收入，至於企業好唔好、有冇問題，呢啲自己心中有數，自己知道。如果有世界500強嘅光環護身，政府接待嘅時候會對企業高看一眼，而且500強嘅公司更容易向銀行申請貸款，但企業真正發展係靠內在能力、創新實力、人才沉澱同管理水平。
不過董明珠呢番說話，聽落似係影射緊財務狀況岌岌可危嘅碧桂園（2007）。碧桂園喺2017年首次入選世界500強企業，排名由2017年嘅467名攀升至2022年嘅138位，2023年回落至206名。但喺《財富》發佈完500強名單後，碧桂園就傳出債務問題，面臨爆煲危機。最近喺美國申請破產保護嘅恒大集團亦同樣登上過世界500強，成績最好嗰次係喺2021年排名第122位。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
