香港有唔少關於感情煩惱同兩性關係嘅投稿平台同討論區，間唔中都會有人出post「求X醒」，但如果有人專職負責「X醒」求助人，你又會唔會課金幫襯呢？據內地傳媒報道，打擊「戀愛腦」喺中國成為咗一門熱門生意，部分收錢鬧醒戀愛腦嘅網店月收入隨時高達6至7萬人民幣。
客戶多數係後生女 陪聊師日賺二三千
《澎湃新聞》訪問咗一名提供鬧醒戀愛腦服務嘅網店老闆小陸，佢嘅客戶群體一般係20至25歲嘅後生仔女，其中女性客戶佔98%。客戶嘅需求五花八門，有人係同另一半鬧交所以心情唔好，有人係飽受家庭矛盾困擾，仲有人係落單搵專人幫助情緒低落嘅朋友。
不過唔係所有網店都係由店主本人提供陪聊服務，淘寶網店店主姜楠喺《新浪財經》嘅採訪中介紹其網店嘅業務運作模式——姜楠擔任對接同溝通嘅角色，負責分派訂單畀陪聊師，然後舖頭同陪聊師按3:7或者4:6嘅比例拆賬。經驗豐富嘅陪聊師仲會同多間網店合作，每日收入最多可以有兩、三千元（人民幣，下同）。收費方式同服務形式都分好多種，有啲網店同陪聊師會按分鐘收費，有啲就係直接買全日嘅服務，有啲係打字溝通，有啲係電話傾偈。部分大型網店嘅店主一個月嘅淨收入可以高達六至七萬元。
聲線夠溫柔 客仔會返頭
由於擔任陪聊師嘅門檻唔高，所以好多人會主動應聘。姜楠喺客戶落單後會問清楚需求，有啲客人會想搵名校畢業或者主修心理學嘅高材生，亦有客人會要求搵一個把聲好聽嘅陪聊師。
陪聊師會按服務水準同接單金額劃分成幾個等級，例如搵「盲盒」語音陪聊30分鐘只需30元，「充電寶」同「溫柔港」嘅收費分別係40同60元，最高級嘅「錦鯉」陪聊師就要收100元。
電影帶挈樹窿生意成功
作為一間中等規模嘅網店，姜楠嘅舖頭原本喺生意好嘅時候每日可以賺到五、六百元，月收入大概係一萬至兩萬元左右。
但連姜楠都冇諗到，6月上映嘅一套電影居然會帶挈「樹窿」行業賺大錢。電影《消失的她》講述事主因為戀愛腦而遇害，曲折離奇嘅故事情節同埋被愛情衝昏頭腦嘅人物設定成功喺網上掀起關於戀愛腦嘅討論，為打擊戀愛腦服務帶嚟龐大流量，#罵醒戀愛腦#一度登上淘寶熱搜，姜楠網店嘅單日銷售額亦接近破千。喺6月26日至7月1日期間，姜楠舖頭嘅支付金額環比上漲超過300%。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
