廣東肇慶一間中學嘅小賣部招租引起全國關注，事關呢個150平方米嘅舖位以天價成交，5年租金總額高達940萬元（人民幣，下同），平均每個月要交15萬元租。就咁睇呢筆租金貴到離譜，但有心水清嘅網民表示喺中學開小賣部其實遠比想像中好賺，不過亦有人擔心「羊毛出在羊身上」，天價租金最後只會轉嫁到學生身上。
「天價小賣部」坐落於廣東省肇慶市懷集縣懷集中學。根據招租及成交公告，小賣部屬於非禁止出租資產，評估價同掛牌價約為總租金38萬元，成交後可以售賣生活日用品、文具、飲品同零食，以及提供充電同手機卡充值服務。經網上電子競價交易後，最終成交價為5年租金總額9,430,560元，平均月租要成15萬元，以呎租計即係100蚊港紙，拍得住尖沙咀一帶嘅舖租。
其實懷集只係一個四五線小縣城，月租15萬呢個「天文數字」似乎同當地嘅經濟水平不成正比；再加上學生喺寒假、暑假期間未必留校，小賣部每年可能只得9.5個月係正常營業，即係喺呢9.5個月入面，小賣部每個月要做20萬生意先夠交租；如果計埋水費、電費等必要開支同入貨成本，開呢間小賣部幾耐先回到本呢？
網上資料顯示，懷集中學有逾8,300名學生同632名教職員，而呢間佔地402畝嘅學校入面只有呢一間小賣部，簡直就係壟斷式經營，開業之後可能全校幾千名師生都要幫襯呢間小賣部，寄宿嘅師生更要靠佢解決生活所需，潛在購買力驚人。競拍者一定係計過數後覺得有利可圖，先會以高價承租。
除咗懷集中學，其他地方都有學校試過以天價出租小賣部經營權，例如2016年廣西南寧三中小賣部以年租金173萬元成交，以及2021年湖南邵陽新寧二中小賣部以3年租金總額320萬元出租。
有人質疑高價出租小賣部係將教育當成生意咁搞，榨取家長嘅血汗錢；亦有人提出既然小賣部以天價出租，又壟斷校內生意，咁開業後嘅定價應該要受校方或者有關部門監管，否則萬一小賣部為增加利潤而提高商品價格，只會間接增加學生嘅消費支出。
對此，懷集縣教育局表示，小賣部歸屬當地國資委管理，其競拍嘅租金並唔屬於學校，教育局亦會喺開學後關注小賣部嘅貨品售價。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
