內地房地產開發商接連爆煲，原定喺2021年交樓嘅深圳天谷大樓最近亦因為開發商破產而陷入爛尾困局，項目嘅營銷中心仲放咗一個印有「用心服務 用愛溝通」嘅巨型背景板，唔通發展商真係諗住用「愛」感化一班心急如焚嘅業主？不過可能學鄧不利多話齋，愛真係世上最偉大嘅魔法，正如內房專家蔡金強喺最近一集《股壇C見》中都講到，中央依家都係用緊關懷嘅眼神期望樓市自己企起身：「呢個係愛嘅期望。」
業主：項目原已延期兩年 目前無動工跡象
天谷大樓位於深圳市寶安區，由深圳市華訊方舟投資有限公司開發。項目喺2019年獲發預售許可證，原定會推出993套單身宿舍同112套產業研發用房。《每日經濟新聞》引述其中一名full pay買樓嘅業主劉女士（化名）指，天谷大樓原本應該要喺2021年交樓，依家已經延期超過兩年，點知開發商直接破產，項目亦冇繼續動工。
用大型告示牌勸喻業主冷靜包容？
現時天谷大樓嘅項目營銷中心設置咗一個「群眾訴求服務站」，現場有破產管理人同政府工作人員收集業主嘅訴求，工作人員亦會解答業主關心嘅問題，例如復工時間、駛唔駛簽補充協議同會唔會有新投資人。
營銷中心入面最搶眼嘅莫過於印有「用心服務 用愛溝通」嘅大型背景板，塊板仲寫住「仁愛」、「尊重」、「理解」同「寬容」，不過對於已經畀咗錢嘅業主嚟講，呢塊背景板應該無法緩和佢哋嘅焦慮同憤怒，畢竟根據其中一名業主所講，天谷大樓之前揚言要打造成國內第一個集衛星互聯網研發、商業運營、產業聚集、產業孵化演進嘅全產業鏈創新產業園。但項目開發商破咗產，連樓都未必交到，仲何來咩創新產業園呢？
業主變苦主 被迫簽協議唔准追討
雖然目前華訊方舟投資嘅名稱同辦公室地址都冇變，但股權持有人已經變更為深圳市興甘融實業有限公司。為咗方便引進新嘅投資者，業主需要同華訊方舟投資再簽訂一份補充協議以繼續履行房屋買賣合同，不過協議內容睇落對業主非常不利，入面寫明「若因本補充協議生效前的原因發生違約、賠償損失、補償情形，本補充協議生效後對雙方產生相互豁免效力，任何一方自願放棄權利均不再相互追究責任和主張任何權利。買受人與任何第三方之間包括但不限於讓渡、服務、中介、顧問、股權、擔保、代收代付、手續費、利息、違約等超出《預售合同》購房款本金外任何事項與出賣人無關，買受人無權向出賣人主張任何權利。」
劉女士話自己唔想簽呢份補充協議，因為項目尚未復工，佢擔心簽完呢份不追責協議之後，反而會落得「錢房兩空」嘅下場。政府人員提供嘅另一份文件顯示，如果業主拒絕簽署補充協議，就會被視為「解除原合同按普通債權處理」，即係之前畀過嘅錢依然無法立即退還，只係會轉化成債權。據悉，目前天谷大樓已經售出553套房產，而截至8月22日下午，已經有超過130戶業主簽咗補充協議。
憑著愛 我信內房有出路？
其實唔係得內地發展商諗住用「愛」解決問題，奧陸資本總裁兼首席投資官「小金人」蔡金強喺最新一集《股壇C見》節目中探討中央對內房嘅取態時亦講到，內地政府希望市場復元嘅心係存在嘅，只係唔係換器官式嘅大改造，「佢係想市場喺佢關懷嘅眼神下睇佢可唔可以自己起身，呢個係一個愛嘅期望。」
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
