中國瑞幸咖啡同貴州茅台crossover推出酒精含量只有0.5度嘅新產品「醬香拿鐵」，咖啡配茅台呢個新奇組合成功吸引大量「白老鼠」試飲，單日銷量甚至突破542萬杯，銷售額超過1億元（人民幣，下同）。連茅台官方都表示新產品銷量遠超預期，醬香拿鐵將會成為持續推出嘅常設產品。
半價優惠吸引消費者試飲
瑞幸咖啡推出嘅呢款醬香拿鐵，加入咗酒精濃度53度嘅中國名酒貴州茅台，每杯酒精含量為0.5度。醬香拿鐵原價要38元一杯，但試飲價只需19元，吸引咗大批消費者幫襯。有顧客為咗滿足好奇心，不惜苦等40分鐘去買一杯醬香拿鐵，不過試完就覺得味道怪怪地，仲有網民形容醬香拿鐵嘅味道好似玫瑰腐乳汁；亦有人表示味道其實唔錯，酒味唔算太重，啱啱好中和咗咖啡嘅苦澀味。
咖啡溝白酒呢個前衛嘅組合掀起網民熱議，網上嘅討論度成功帶動醬香拿鐵銷量上升。瑞幸咖啡喺9月5日朝早發文表示醬香拿鐵已經刷新單品紀錄，首日銷量超過542萬杯。有網民講笑話542萬杯醬香拿鐵疊埋一齊，高度相當於95座珠穆朗瑪峰。
消費者飲一杯就賺9蚊？
除咗受好奇心驅使課金試伏，網上仲有一班數口精嘅消費者係為咗「賺錢」而幫襯瑞幸。經過網民嘅精密計算，一支500ml裝嘅53度飛天茅台嘅售價為3,299元，而一杯醬香拿鐵嘅成本為28.04元（中間係冇詳細推論的）。假設以19元嘅優惠價買一杯醬香拿鐵，咁消費者實際上就賺到9元。以茅台週一收市價（1,866.00元）計算，顧客只要飲夠208杯，就可以賺到一股茅台！
派利是慰勞員工 6個人瓜分100蚊
醬香拿鐵大受歡迎，瑞幸喺賺錢之餘，亦不忘慰勞一班員工——咖啡師同客戶服務員等前線員工喺9月4號都收到公司派發嘅利是。每間分店嘅員工收到嘅金額都唔一樣，有幸運嘅網民喺網上分享自己拎到200元，不過亦有瑞幸員工表示自己要同另外5個同事「憑手氣」瓜分100元利是。
用茅台加工食品 = 侵權？
其實喺瑞幸同茅台合作推出醬香拿鐵之前，市面上已經出現過茅台咖啡，例如貴陽有間咖啡店推出過一款120ml嘅 「濃縮咖啡馬天尼飲品」，當中加入咗15ml嘅43度飛天茅台，售價高達198元。
但據茅台工作人員所講，咖啡店擅自喺飲品中加入茅台再對外出售，就算店主冇以此作賣點宣傳，實際上都係侵權嘅行為。
茅台擬繼續推出特色產品 開拓年輕人市場
喺茅台眼中，其他商家用茅台加工製作食品可能涉嫌「侵權」，不過茅台自己就點加工都冇問題。早前喺茅台冰淇淋推出一週年嘅慶祝活動上，茅台集團董事長丁雄軍曾表示，公司會加大研發酒心朱古力、含酒飲品、軟冰等產品，推出唔同類型、唔同價位嘅特色商品。
推出茅台加工產品，可能會成為茅台擴大商業版圖嘅關鍵，畢竟茅台品牌主要嘅目標群眾係40至49歲嘅中年人，而茅台今次同廣受29歲以下消費者歡迎嘅瑞幸合作推出醬香拿鐵，有助茅台得到更多年輕消費者嘅關注。
唔止係國酒 仲係A股股王
茅台一直有「國酒」嘅美譽，就連喺經濟上都有「神聖」地位。據《金十數據》資料顯示，貴州茅台自2020年起就穩坐A股「股王」寶座。單係貴州茅台2020年嘅總市值（1.56萬億元），已經高於貴州省2018年嘅GDP。目前，貴州茅台嘅總市值約為2.34萬億元。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
