想喺投資市場上慳啲學費，就要汲取行為經濟學嘅學問，甚至利用他人的謬誤提升投資回報。
投資者大多數都聽過「市場效率」（Efficient Market theory）假設，踏入現實世界先發現資訊唔多流通、大戶舞高弄低股價、身邊嘅群眾都唔多理性……除咗自己。作為經濟學先行者、諾貝爾經濟學得獎者Daniel Kahneman撰寫嘅《快思慢想》就列出至少10種常見認知偏誤，例始賭徒謬誤（The Gambler’s Fallacy）同短視偏誤（Present Bias）。
賭徒謬誤
雖然每個市場玩家都自稱「投資者」，但其實單憑一條問題，就分得清你係「賭博」定「投資」：如果一隻股票連升5日，你覺得佢聽日會升定跌？
散戶常誤以為「逆轉一刻」就在眼前
好多時候，散戶見到連續嘅升跌勢，就會認定逆轉準備來臨，因為覺得「市場情緒無可能咁激」，要維持一個長遠趨勢嘅機率好細，沽貨後隨即反手造淡。
不過，有金融人就用蘋果公司作例子狠狠打臉：統計1984至2014年嘅股價表現，當蘋果連升5日，其實下一日係有48.2% （55次）機率升，51.8%（59次）跌，機率接近打和。
蘋果股價連升7日後 第8日升多過跌
當連升7日時，機率就更加弔詭，竟然有6成8機會（18次）繼續升，買跌反而容易損手離場。
Daniel Kahneman形容抱持「賭仔心態」、期待逆轉係人之常情，因為數學書教過大家，擲硬幣擲出「公」同「字」嘅概率係各佔50%，但散戶錯就錯在將事件嘅長線概率放諸短線。
例如擲硬幣時想擲出理論上50/50嘅平均概率，其實係要至少100次先叫做接近。如果只睇短線，擲10次嘅波動性非常之高，有5%會擲出「7個公」；到擲100次嘅話，就剩返0.002%機會擲出「70個公」，攤分到唔少波動性。
所以，如果想判斷一隻股票嘅升跌，與其睇佢連續升跌幾耐，不如研究驅動趨勢背後嘅成因更實際。例如新聞係咪已被市場完全消化（price in），影響嘅規模及持續性，同埋打探潛在嘅利好或利淡消息。
以當年蘋果嘅連續升勢為例，投資者可以分析佢到底係一個泡沫，定係真係由強勁嘅業績支撐？股票估值係過高到爆煲，定係有市場玩家因為洞悉到蘋果未來產品嘅潛力，所以預先增持等收成，谷高咗市盈率（PE Ratio）？
反向利用賭徒謬誤 嚴守止賺止蝕
謹慎分析之外，你亦可以反向利用賭徒謬誤，提醒自己執行止蝕、止賺嘅投資紀律，尤其係高波動性嘅短線操作中。
因為長遠而言，只要投資者持續下注高風險報酬比（Risk-reward Ratio）嘅投資，短期或會勁賺勁蝕，但如果做夠100次、1000次，就會好似擲硬幣嘅理論一樣，投資贏輸嘅機率逼近風險報酬比，享受長線投資嘅成果。當然，前提係要做足功課，投資符合風險承受能力嘅產品。
短視偏誤
無人願意承認自己短視，但下面呢兩題選擇題，讀者就要誠實面對自己。
第一，你寧願52星期後獲得 $1500，定係48星期後得到$1250？
好多人都願意為20%嘅額外回報而選擇等待，但如果你可以即刻拎到 $1250，或者4星期後攞到 $1500，唔知你又會點揀呢？
今次，相信好多人都會見到「即刻」就破功，而研究亦都發現如是。但係，兩個情境裡面嘅等待時間同潛在回報都係一樣，只係因為大家都較為重視眼前，所以忘記咗用理性去計算，直接用直覺衝動選擇，所以又名「短視偏誤」（Present Bias）。
唔識想像未來 剩係重視現在
諾貝爾經濟學得獎者Daniel Kahneman解釋，人腦嘅思考模式可分成兩種，分別係「快思」（system 1）及「慢想」（system 2）系統。佢指出，「快思」系統用感性同習慣反射做決定，非常重視當下，以求短期生存。95%人類行為都係由「快思」負責，只有5%抽象又需要分析嘅任務，先會越過重重難關，啟動「慢想」模式，包括思考未來呢項挑戰。
放諸市場理解，投資者好多時會自覺仲有大量時間增值財富，即使有損失都可以慢慢追返，所以偏向投資進攻型、風險較高嘅資產，少理防守性、風險回報偏低嘅產品，例如國債或定存。
然而，一個全面嘅投資組合應該包括唔同特性嘅產品，並按自己嘅年齡及人生計劃調整比例。如果用年輕時「來日方長」嘅心態投資，一味「All In」炒股，可能會令投資者曝露於過多嘅風險當中，影響成家立室或退休等計劃。
喺美國，有三分二人就完全無供過自己嘅退休金計劃，晚年生活猶如計時炸彈。加州大學洛杉磯分校嘅教授Hal Hershfield觀察到呢個現象，就決定用科技縮短未來同現在嘅距離，將思考未來從「慢想」移去「快思」模式，成為直覺。
喺實驗中，Hershfield用電腦設計並向參與者展示佢哋70歲嘅容貌，再要求佢哋用1分鐘同自己深情對視。事後，Hershfield問佢哋：「如果無啦啦得到$1000，你會將幾多撥入退休基金？」，發現見完老年版自己嘅學生平均會為退休投入$172，比普通學生多出1倍以上。
活在當下 也要善待將來
雖然活在當下係人之常情，但認識短視偏誤後，投資者可以設計唔同嘅方法，重視現在，亦都善待未來嘅自己。
例如市面唔少個人化嘅理財軟件，會分析用戶嘅特性後，作出貼合唔同年齡層嘅建議，令思考未來變得簡單。至於好似Hershfield一樣視象化、遊戲化大家的將來，都可以令人用更少力氣達成目標，知己知彼，無往不利。
更多歷久不衰的投資書藉精華
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
