繼早前西安喺TFBOYS「十年之約」演唱會嘅帶動下大賺超過4億人民幣後，正喺內地舉行巡迴演唱會嘅周杰倫接力成為下一位「財神爺」！呢位樂壇天王即將喺10月中旬駕臨上海開show，唔止門票一開售就秒速售罄，就連鄰近演唱會場館嘅酒店價格亦大幅上升近兩倍！
演唱會期間 酒店價格貴過中秋國慶
周杰倫2023嘉年華世界巡迴演唱會上海站將於10月12至15日喺上海體育場舉行，不過一班fans喺搶完演唱會門票之後仲要硬食貴價酒店——上海體育場附近嘅酒店房價喺演唱會期間大幅上漲，價錢比平時高出唔止一倍，部分酒店甚至已經爆滿，一房難求。
以距離上海體育場680米嘅錦江都城酒店為例，Trip.com顯示平日都會雙床房嘅房價約為515元，相同規格嘅酒店房間即使係喺中秋、國慶前後嘅日子都冇出現價格變動。但如果將訂房日期改為10月12日至13日，都會雙床房嘅價格就會飆升至1,511元，升幅高達193%，而價格更低嘅房型已經全部售罄。
睇埋另外一間距離上海體育場330米、評分同星級都較低嘅艾享時尚旅店，演唱會期間入住只得20平方米嘅時尚單人房都要748元/晚，價錢係平日房價嘅三倍有多。
雖然酒店房價翻倍，奈何旅客同fans嘅需求實在太龐大，所以加價後嘅酒店都仲係非常搶手，例如距離場館730米嘅上海徐家匯漫心酒店，房價由平時嘅462元上漲到1,228元，但呢間酒店喺10月14日至15日期間已經冇空房可訂。
天津官方認證：周杰倫演唱會帶動逾30億人民幣消費
其實上海並非周董內地巡演嘅第一站，此前佢已經去過海口、呼和浩特同天津等地開show。其中天津市文化和旅遊局引述攜程平台數據指出，演唱會總計觀眾人數18.5萬人次，其中本地觀眾佔比38%，外地觀眾佔比62%，累計綜合消費帶動超過30億元。
攜程數據亦顯示，天津酒店訂單喺演唱會進行期間同比增長447.7%，相較2019年同期增長136.8%，同時帶動機票、火車票、門票等整體出行訂單同比增長269%；而海口同呼和浩特嘅酒店訂單喺演唱會期間分別同比增長166%及580.7%，整體出行訂單分別同比增長97%及152.6%。
明星影響力足以撼動經濟
內地有TFBOYS同周杰倫帶旺地方經濟，外國都有天后級嘅Beyoncé同Taylor Swift為各個城市帶嚟驚人經濟效益。喺今年7月發佈嘅聯儲局褐皮書中，費城聯儲甚至點名提到，今年5月費城酒店收入創疫情以來新高，好大程度上歸功於Taylor Swift喺當地舉辦演唱會，帶動大批遊客造訪；更有調查公司估計，Taylor Swift為期半年嘅美國本土巡演為美國帶嚟接近50億美元嘅經濟效益，價值高過全球50個國家嘅國內生產總值（GDP）總和。而另一位樂壇巨星Beyoncé今年5月喺瑞典斯德哥爾摩舉行巡演，亦被經濟學家視為其中一個導致當地通脹率上升嘅原因。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
