![](https://finance730.com.hk/wp-content/uploads/2023/09/香港夜「殯」紛?-01-1024x1024.jpg)
財政司司長陳茂波尋晚(14日)喺西九文化區主持「香港夜繽紛」啟動禮,一展港府振興夜市經濟嘅決心。為咗帶動現場氣氛,啟動禮仲特別安排咗舞獅表演,只不過大會安排嘅醒獅,疑似係一般只喺悼亡場合出現、被稱為「喪獅」、「孝獅」嘅白色醒獅,真係大吉利是!
陳茂波喺啟動禮致辭時話,雖然社會已經復常,但航班服務、訪港旅客,以至本地的消費力仍有待全面恢復,加上疫情改變咗市民嘅生活習慣,店舖提早休息,市民喺消費時冇咁多選擇,喺呢個背景下催生咗「香港夜繽紛」呢個項目。之前嘅「開心香港」係希望讓市面活起來,而「香港夜繽紛」係希望晚上嘅氣氛熱鬧啲、開心啲。
「香港夜繽紛」嘅活動內容涵蓋海濱休閒、節日精彩體驗、文化藝術同多元娛樂,例如超過八十個商場會喺晚上直播體育賽事同舉辦主題活動、市民可以以優惠價乘搭開蓬巴士夜遊特別路線,以及多個海濱場地將舉行表演、文創活動、小賣攤位及地區特色導賞等活動。
康文署亦宣佈會喺9月29日至11月26日期間延長香港藝術館、香港科學館及香港太空館星期五、六、日及公眾假期嘅開放時間至夜晚10點,並喺每個星期六嘅夜晚推出特別活動。
啟動禮安排孝獅表演?
不過比起一系列嘅活動同體驗,網民似乎更加關心喺啟動禮現身嘅「孝獅」。孝獅係葬禮儀式上使用嘅醒獅,據講典故源於三國時期,馬超父親被曹操殺死後,馬超率領全軍戴孝出征,配備白馬白甲為父報仇。適逢尋日係農曆七月三十日,即係俗稱「鬼門關」嘅日子,夜晚見到白色嘅醒獅真係會嚇到個心都離一離。
![海濱夜市節慶活動食買玩優惠港鐵夜行5送1 香港夜繽紛開鑼冀刺激夜經濟陳茂波:人氣旺自然財氣旺| am730](https://d5ttlem47o98b.cloudfront.net/s3fs-public/styles/banner/public/2023-09/1-0.jpg?itok=GsU_fBiP)
好在平日分享殯葬行業資訊嘅Facebook專頁「賣棺材的男孩」其後出post為大家解惑:「由於整件事太不可思議,最後得武館朋友提供了真實情況,確定這隻現定義是『銀獅』,只是夜晚看上去容易誤會成白獅,因為鼻頭有紅色絨球,而的確香港的喪獅獅身一般只會有黑白二色為主;但假如擴展版圖至兩岸三地其他地區,例如東南亞華人則可能資源問題(正色孝獅難找),或者文化變奏,顏色配搭沒有那麼講究指定,出現純白襯其他顏色的亞種。」
財政司副司長黃偉綸今朝亦有喺電台節目回應網民質疑,佢表示醒獅唔係「白獅」,而係螢光獅子,「大家諗到其他嘢,一笑置之啦」,仲話網上討論都係有趣嘅,聯想無限。
話晒「香港夜繽紛」係近期香港最大型盛事,意頭好緊要㗎嘛,畢竟之前已經有過被神獸撞完後衰足三年嘅前車之鑒,所以有啲嘢真係唔可以大意,下次最好就搵返隻冇咁容易令人誤會嘅顏色啦!
更多最新最熱最有用財經金融地產資訊 請即登記成為Finance730會員
歡迎讀者投稿,稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢 Facebook
▼投資教室 專題研究 YouTube
▼消閒生活 時尚品味 Instagram