上網可以買到「鬧醒戀愛腦」服務已經夠神奇，點知依家嘅網店連「大腦」都有得賣，賣嘅仲要係「愛因斯坦嘅大腦」，每個售價低至0.5元人民幣。咁荒誕嘅商品居然吸引到唔少顧客購買，有網店已經售出超過5,000個大腦，更有唔少買家留低五星好評。
畀完錢就生效 全自動發貨安裝
顧客買完個大腦之後應該點用呢？其中一間網店有喺商品名稱註明，大腦會喺「拍下（落單）後自動長到你大腦上」。另外一間網店嘅客服喺回覆內地媒體查詢時就表示，呢件商品係「無物流發貨」，單純係靠「腦電波傳遞」。由發貨到安裝都係全自動操作，既方便又有效率！
逾3,000條好評 買家對產品相當滿意
其中一間已經售出超過100件愛因斯坦大腦嘅網店獲得咗超過3,000條來自買家嘅好評，評價嘅內容比產品本身嘅介紹更為詳細同精彩。
有買家援引「實例」證明新買嘅大腦真係有用：「已經聰明到爆啦哈哈哈，一買下就記起了忘了好久的支付密碼。必須好評，絕對不是智商稅，買的人都變成最強腦」、「化學元素週期表我都能倒著背了，愛因斯坦的腦子就是好使，大家可以放心衝，真的有用，我覺得我現在去參加高考都能直接考上清華北大了！」
但唔係個個用戶都可以取得咁大嘅進步：「一出貨就感覺有股神秘力量在我的腦子裡蔓延，現在連最難的one two three four我都會讀了。」
店家勸喻：不要退款
其實大家都睇得出所謂嘅大腦只係一個引大家笑吓嘅笑話，只係大部份商家依然會喺產品介紹入面戴返個頭盔：「本商品為虛擬商品，無需物流發貨，拍下後自動發貨，請直接確認收貨。購買前請詳細閱讀寶貝詳情，購買後提供娛樂聊天服務，自己去找客服聊天，娛樂項目，不喜歡可以退款，介意者慎拍！」部分網店仲會補多句：「因為智商已經給您增加上去了，不好再拿回來，所以請您不要退款了。」
網購野生霸王龍 落單後自動行去你屋企
除咗愛因斯坦嘅大腦之外，內地網購平台上仲有好多同樣行抽象路線嘅「國王的產品」，例如研究生專用腦同已經打咗疫苗嘅野生霸王龍……據留低好評嘅買家所講，佢哋嘅霸王龍好有禮貌、入屋會換拖鞋、有大學學歷，仲精通俄語同英語……曲到就嚟變直。
網購平台：買家可以投訴維權
雖然商家喺售賣呢類產品時會寫明產品係「虛擬產品」同「娛樂項目」，但呢種銷售手法可能都係逃唔過網購平台嘅處分。
某網購平台嘅客服喺回覆內地傳媒時表示：「不建議消費者下單此類商品；如果下單後產生糾紛，可以向平台投訴維權。如果懷疑賣家所售商品有問題或屬於違規違禁商品，也可以向平台檢舉。賣家行為是有記錄的，平台會進行排查核實，一旦發現有問題，就會進行下架、扣分等處罰。」
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
