唔係個個打工仔都願意同老細分享自己嘅私生活，但有時老細開到聲話想follow你嘅Facebook，身為員工嘅你又未必有勇氣對老細say no，最後唯有忍痛清空同公司、老細同同事相關嘅stories同posts，然後接受老細嘅交友邀請。不過紐約州長近日正式簽署法令，禁止老細訪問求職者同員工嘅私人社交媒體帳戶，打工仔唔需要再擔心老細會喺IG上見到自己work from hill（但可能會被其他人篤背脊）！
根據新法案，僱主不得要求員工或求職者披露任何個人帳戶嘅用戶名同密碼，亦唔可以向員工索取訪問個人帳戶嘅權限，仲規定通過社交媒體獲得嘅個人資訊唔可以用於招聘或紀錄目的。
其中一名有份起草法案嘅議員Jeffrey Dinowitz強調，現時有唔少僱主會窺探員工或準員工喺社交媒體上嘅活動，而新法案旨在防止僱主無理索取員工嘅社交媒體帳戶資訊，同時確保員工有權自由選擇是否公開個人社交媒體帳戶，員工同求職者唔需要擔心自己會因為喺社交媒體上分享嘅內容而被不公平對待，更加唔需要為咗保住自己嘅飯碗而喺唔情願嘅情況下接受僱主嘅要求。
瀏覽紀錄都唔係秘密 HR：部分求職者甚至要交出帳號密碼
打份工啫……老細真係有必要起員工底？《紐約郵報》引述人力資源公司Workhuman首席人力資源官Steve Pemberton指出，如果公司喺招聘時完全唔睇個人資料，可能會演變成公關災難。因此，部分公司喺聘請高層員工時，仲會搵私家偵探調查準員工嘅背景，私家偵探亦有可能會喺專門售賣第三方數據嘅掮客手上取得更多私隱資訊，例如準員工嘅搜尋紀錄同訂閱網站名單都可能會被準僱主知悉，就算開埋無痕模式都未必有用。
咁如果求職者事先喺Instagram上刪除相關貼文呢？網絡監控專家J.S. Nelson指出，部分網站可能會保留社交媒體同其他網站過去嘅資訊，等於有一道「後門」可以畀人隨時查看曾經發佈嘅內容。不過Pemberton補充，一般公司關注嘅重點都係現時仍公開可見嘅內容，例如要睇下準員工喺社會問題上嘅立場會唔會造成爭議。Nelson表示，部分應徵法律同金融工作嘅求職者甚至會被要求交出佢哋嘅帳戶密碼。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
