大部分人都認為工作機會同學歷程度掛勾，學歷越高對搵工嘅幫助就越大。不過最近內地有一名00後畢業生喺求職過程屢次受挫，點知佢將履歷中嘅學歷改為「高中畢業」後，反而獲得大量面試機會。
呢名啱啱畢業嘅00後大學生表示自己由7月開始求職，但係啲工作一係唔適合自己，一係要求應徵者要有工作經驗，所以佢投遞咗幾百份履歷都冇回音。事主表示自己對工作嘅要求唔高，如果工作量唔多，佢甚至可以接受月薪只得3,000人民幣嘅工作，但本科畢業嘅佢連工廠職位都搵唔到。
一怒之下改學歷 結果更受僱主歡迎
事主坦言自己讀咗咁多年書，實在接受唔到自己搵唔到工作，於是佢懷住滿腔怨憤，將自己履歷入面嘅最高學歷由「大學畢業」改成「高中畢業」。點知佢第二日再打開求職app，就見到有幾十個HR聯絡佢。
其後事主將呢段匪夷所思嘅經歷分享到社交平台，有唔少網民表示自己都有類似經歷：「用高中學歷找工作後，已經收到兩份offer，一個是飯店前台，一個是推廣。工作內容都不複雜，薪資也不高。之前用本科學歷去投人事、行政崗位都沒人搭理，現在反而比以前有更多回覆，關鍵是工資都差不多。」
本科生就業難：兩頭唔到岸
數據亦證實中國大學生喺求職過程中未必擁有優勢。智聯招聘發布嘅《2023大學生就業力調查報告》比較咗2023年畢業嘅碩博生、本科生及大專生獲得offer嘅情況：有56.7%嘅碩博畢業生同54.4%嘅大專畢業生成功獲得offer，分別比整體高出4%及6.3%，但獲得工作機會嘅本科畢業生只得47.5%，較整體低2.9%。
其中畢業於普通一本及二本院校嘅畢業生更難就業，獲得工作機會嘅比例分別比專科生低5.8%及8.2%。
報告指本科畢業生求職進展不佳，一來係因為白領職位喺招聘時更青睞高學歷人才，而藍領職位就傾向招聘技術性畢業生，二來大部分本科生不具有且不願意接受實用技術性職位，所以只可以同更高學歷嘅畢業生競爭，導致獲發offer嘅比率更低。畢業自普通二本院校嘅大學生處境更為尷尬——佢哋同名校畢業生競爭時要面臨更大壓力，實用技能又比唔上專科生，加上大學生對就業職位期待較高，最後陷入兩頭唔到岸嘅困境。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
