儲極都儲唔到第一桶金？但可以先買第一粒金！唔好以為只有中老年人會買黃金保值，依家連內地後生仔女都開始流行儲黃金。比起入場門檻較高嘅金條、手工費較貴嘅金飾，佢哋更偏好購買細細粒嘅金豆，小金豆亦成為電商平台嘅熱銷產品。而由於今年人民幣持續貶值，推高咗黃金呢類保值品嘅價格，有內地同胞仲專登嚟香港買金返深圳轉售賺差價。
上淘寶搜尋「金豆子」，就會見到五花百門嘅迷你黃金產品，例如小金豆、金元寶、金瓜子、金福袋、金葫蘆、金豌豆……重量大多介乎於1克至10克不等。參考其中一間淘寶網店嘅價格，1克號稱「足金999」嘅金豆售價為525元人民幣；相比之下，如果要喺香港連鎖珠寶店買金粒同金條，最平嘅三錢裝金粒都要差唔多6,000元/粒先入到千，所以收入唔高、存款唔多嘅年輕人大多傾向購買價格門檻更低嘅「輕量裝」金豆。
有買入金豆嘅年輕人表示，自己啱啱踏入職場，每月收入約為6,000元人民幣，扣除必要開支之後其實儲唔到幾多錢，而儲金豆相當於強制儲蓄，可以避免自己揮霍晒成份糧變月光族。
亦有人喺經歷過多次投資失利後改為投資黃金，住喺北京嘅王女士表示：「股票基金都虧了，銀行理財也偶爾跌破淨值，還是金豆『看得見』，讓人感覺安全一些。」
購買金豆需注意風險
不過投資黃金唔係完全冇風險，如果投資者盲目跟風，從唔可靠嘅商店或網店買入金豆，可能會買到成色不足嘅黃金。網上已經有消費者反映自己曾經喺某直播間買入10粒聲稱係「足金999」嘅金豆，但拎去打金店先被告知呢啲金豆成色不足，只能以低價回收。
買入金豆時亦需要考慮埋商家會唔會回收金豆，因為部分金店講到明對金豆係只銷售、不回購。購買時仲要留意商家收取幾多手工費，假如係為咗投資而買入金豆，咁手工費自然係越低越好，否則會影響投資價值。
來港買金轉售有利可圖
除咗儲金豆保值，最近仲有人喺深圳同香港嘅黃金差價中搵到商機。《東方財富網》引述喺深圳水貝從事黃金回收工作嘅王先生表示，由於近月人仔貶值推高保值產品價格，內地金價較香港高水最多7%，每克價錢可以相差近18元人民幣，所以有人會特登走嚟香港買黃金，再拎啲黃金去水貝，賣畀回收黃金嘅商家。
但轉賣黃金賺差價有可能係違法行為。深圳海關規定，無論係內地定係香港居民旅客，進境可攜帶嘅黃金及其製品以自用、合理數量為限，而具體認定標準由入境口岸嘅海關執法人員判斷。根據相關規定，超出自用、合理數量嘅黃金及其製品，視同進口貨物，海關憑中國人民銀行嘅批件，予以徵稅放行。如果冇批件，具體處理辦法由入境口岸海關決定。一般而言，如果隨身攜帶嘅物品價值超過（含）5000元就需要補稅。亦有專家指出，出境旅遊消費同以賺差價為目的嘅商業經營活動有本質差異，一旦超過法律標準則涉嫌走私。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
