2012年面世嘅手機遊戲《Candy Crush Saga》人氣長年居高不下，至今已經更新到超過14,000關，雖然關卡難度越來越高，但仍然有唔少忠實玩家捧場。Candy Crush開發商King表示，呢款遊戲11年來嘅手機下載量已達50億次，收入突破200億美元（約1565億港元），營運團隊嚟緊仲會為一班fans推出第15,000關！
《路透社》形容Candy Crush係遊戲界「免費增值」遊戲模式嘅先鋒——玩家唔需要付費下載遊戲，不過可以喺通關過程中選擇課金買道具，或者通過觀看廣告降低通關難度。
King總裁Tjodolf Sommestad表示，Candy Crush同《農場英雄傳奇》（Farm Heroes Saga）等遊戲嘅存在，證實咗手機遊戲都可以有持久嘅吸引力。「我哋向自己同行業證明，『上咗年紀』嘅遊戲亦能夠重新綻放光芒，甚至可以喺10年後再次打破紀錄。」
經營一款「歷史悠久」、欠缺「新鮮感」優勢嘅遊戲並唔容易。總經理Todd Green表示，其實團隊一直有更新遊戲，除咗加入新關卡之外，仲會諗辦法完善遊戲細節，例如調整糖果跌入網格時嘅細微反彈，希望為玩家帶嚟更好嘅遊戲體驗。
最難係超越自己？
Sommestad稱，Candy Crush喺過去六年都係美國應用商店最受歡迎嘅遊戲，呢個成就固然突顯咗開發商戰略嘅成功，但亦意味著新嘅遊戲開發者正面臨一個巨大挑戰。
「我哋有努力開發新遊戲，不過門檻太高，開發一款新遊戲需要投入大量精力。我哋當初用咗幾個月打造Candy Crush，但之後我哋用咗10年時間發展呢個遊戲。」
微軟想將金蛋納入旗下
King喺2016年被美國遊戲龍頭動視暴雪（ATVI）以59億美元收購。單計今年第二季，King貢獻咗7.47億美元嘅淨收入，佔動視暴雪總收入嘅31%。
2022年1月，微軟（MSFT）宣佈出價687億美元將動視暴雪收入囊中。微軟Xbox業務負責人Phil Spencer更曾經公開講過，佢哋唔係為咗暢銷遊戲《決勝時刻》（Call of Duty）收購動視暴雪——佢哋真正睇中嘅係Candy Crush之類嘅手機遊戲。
可惜微軟收購動視暴雪嘅過程一波三折：先係英國競爭與市場管理局（CMA）對收購案提出擔憂，其後美國聯邦貿易委員會（FTC）喺上年12月以收購案會令任天堂、Sony等遊戲行業競爭者失去競爭力及損害消費者利益為由，對收購案提起反壟斷訴訟，導致微軟至今仍未收購成功。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
