Kim Kardashian同Kylie Jenner嘅家族出咗名多花生同drama，但有冇諗過連理財都要keeping Up With the Kardashians？最近一項研究發現，Z世代女性傾向向Kylie Jenner等網紅同名人尋求理財建議，並視佢哋為「白手起家」嘅偶像。另一項調查則指出有超過一半Z世代認為進軍網紅界大展拳腳係一件好簡單嘅事，如果有機會的話，佢哋甚至願意辭職成為網紅。
市場顧問公司Sooth喺今年8月發佈咗一份關於Z世代理財習慣嘅報告，結果顯示Z世代嘅女性更重視理財規劃——有近89%重視儲蓄同創造財富嘅Z世代成年人為女性，佢哋對儲蓄相關嘅網上內容嘅關注度係全國平均嘅15倍。
不過有理財意識嘅Z世代更容易受佢哋喺社交媒體上追蹤嘅用戶影響（例如遊戲玩家同真人show明星），受影響程度比起全國平均高出62%。
研究指出：「Z世代多數唔會關注嗰啲聲稱係理財專家嘅用戶，佢哋反而更關注佢哋眼中『成功』、『白手起家』嘅女性楷模。」
向名人、明星學習理財
「白手起家嘅女性楷模」係指邊啲人呢？喺眾多名人、網紅之中，Kylie Jenner、Kendall Jenner以及佢哋嘅姊妹深受Z世代嘅喜愛，已經投身職場賺錢嘅Z世代更傾向參考同模仿呢班名人嘅金錢觀同行為，同樣受到Z世代青睞嘅仲有Ariana Grande、Zendaya同Selena Gomez。
Sooth創辦人Ian Baer指，如果Kylie Jenner同其他名人支持一間品牌，或者同某間公司有財務關係，咁Z世代嘅女性可能就會覺得呢間企業係一間值得投資嘅公司。
比起Z世代女性嘅學習對象，Z世代男性眼中嘅楷模、現年62歲嘅任天堂美國分公司前總裁Reggie Fils-Aimé可能更貼合大眾眼中「投資專家」嘅形象。有趣嘅係，Z世代男性覺得Fils-Aimé嘅敏銳程度比股神巴菲特或者其他主流金融思想領袖高出6倍。
Z世代相信可以輕鬆靠影響力搵食
根據另一項關於Z世代嘅調查，有57%嘅受訪者表示，如果要喺「現時從事嘅工作」同「成為網紅」中二揀一，佢哋會選擇後者。喺呢班Z世代中，有53%人認為成為網紅係一個有信譽的、值得信賴嘅職業選擇，甚至有近三分之一嘅後生仔表示願意畀錢成為網紅。不過結果亦顯示，其實大部份成年人都唔知自己成為網紅後會發佈咩類型嘅內容。
Morning Consult嘅品牌分析師Ellyn Briggs表示，TikTok嘅出現令更多人認為自己可以投身網紅工作，調查結果亦反映Z世代相信成為網紅並以此維生係一件好輕鬆嘅事。Briggs認為，賺錢嘅能力、彈性嘅工作時間及有趣嘅工作內容都係年輕人渴望成為網紅嘅原因。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
