內地女畢業生用Tinder搵工　6招「小心機」對抗失業

成日話返工「識人好過識字」，但邊度先可以搵到「對的人」？有內地畢業生忽發奇想，既然平時碌Tinder都係想配對良緣，不如索性喺上面搵埋未來嘅公司老細。於是佢將靚樣Profile Pic換成大大隻字：「有人公司缺人嗎？求職中」。聽落荒謬，但最成功嘅例子唔單止事業得勝，仲收獲埋一位未婚夫。

據國統局統計，內地今年每五位青年就有一位失業，搵工確係爭崩頭。對於受過大學教育嘅畢業生嚟講，情況更加嚴峻。有私人機構發佈《2023大學生就業力調查報告》，發現本科學歷對求職者可能係一種負資產，因為內地大學畢業生就業率只得47.5%，比學歷次一級嘅大專生仲要低多7%。

有小紅書博主獻計，籲女畢業生要喺市道唔好時「在Tinder找工作，在Linkedin找對象」，仲分享六招「小心機」，教大家「狠狠利用男人，畢竟性別紅利都讓他們吃夠了」。

佢嘅Tinder求職6個小撇步包括：

盡量配對想做果個行業嘅男士，「例如我想求職嘅係市場營銷部門，如果碌到市場營銷經理，我就一定會滑一下」
做好門面功夫，唔好一嚟就開門見山話我想搵工，「唔好意功利性太強，唔好一開波就好似搵緊免費獵頭」，反而應該藉住共同話題打開話匣子，例如「我哋係同行喎，你最近加班嚴重嘛？最近6.18大促銷，你忙唔忙忙呀？你之前係讀咩主修科㗎？」，話術嘅時重點係將話題帶到對方身上，令對方產生「我一定要教你一啲嘢」嘅心理。
多啲比機會對方表現自己成功嘅一面，然後再適時拋出煩惱，等對方扮演一個「英雄救美」嘅角色，解決你嘅煩惱。例如話「我最近覺得我嘅上司一直喺到『PUA』我，有啲想轉工呀」，「我最近嘅職業發展好迷惘呀，你可唔可以比啲建議我？」
如果對話氣氛良好，對方又成功被套上「成功人士」嘅設定嘅話，博主認為佢哋有高達70%可能性會試圖幫助求職者。
最後，當對方施以援手，一定要表現感激之情，更需要有實際行動，例如請食飯。見面前亦可以準備一下小禮物，因為面對面見過之後才算係真正嘅networking。
博主仲私心推薦大家望實「ENFJ」和「INFJ」呢兩款MBTI性格嘅男士，話佢哋更熱心助人。

雖然聽落同網上情戀騙徒引人落答嘅說話技巧有幾分相似，但呢位小紅書博主仲自爆，自己都係藉交友軟件搵人幫佢改CV、內部推薦後成功上岸嘅例子。

據數據平台Data.ai顯示，內地去年嘅交友App下載次數佔所有App嘅27.5%，比2017年時攀升2.3倍。求職平台Linkedin喺今年5月全面撤出內地，亦為交友App提供新嘅社交市場。不過識人要睇場合，搵工都要睇平台。

有網民留言指，以上嘅小心機未必適用於本地交友App陌陌同探探，因為裡面嘅用家「質量太差」、「無邊個可以幫你做內部推薦人」，又分析Tinder嘅巧妙，正正係因為佢設有「翻牆」嘅技術門檻，唔單止隔絕咗牆外競爭，亦吸引一眾留學海外或者喺外資公司工作嘅人使用。

更多大學生求職的事