有錢都唔買鑽石？解構「永恆承諾」原石價錢插水之謎

環顧現代中西國度，鑽石同「永恆愛情」都被劃上等號，但呢種礦石嘅不渝地位今年開始危危乎，鑽價近期夥同名錶等奢侈品跌價，現時原石價錢處於見1年低位，有分析師認為鑽石面對嘅主要挑戰者包括實驗室人造鑽石（Lab-grown diamonds），以及開始對鑽石興致缺缺嘅消費者。

2023年鑽石市場變化 hide

鑽無恒久遠：人造與天然鑽石的競爭

隨住實驗室技術越發成熟，人造鑽石同天然鑽石外觀別無二致，連專家都只能憑價錢牌鑑別兩者——目前，實驗室鑽石比傳統平6成以上，每卡約售1425美金（約11,115港元），而傳統鑽石每卡為5185美金（約40,443港元）。

相反，開採傳統鑽石所排放嘅碳量比實驗室多出19倍，從個人定環境角度都唔太划算，難怪連珠寶品牌Pandora都轉推「環保版鑽石」，仲話「諗都唔洗諗揀邊款」。

2021年嘅市場調查顯示，雖然仍有84%消費者較鍾意傳統鑽石，但人造鑽石目前1成嘅市佔率可於10年內翻倍，達到555億美元。

另一個危機，源自消費者需求轉變。鑽石嘅愛情含意看似深植文化，但真正傳入亞洲只喺60年代嘅事，逐漸淡化亦無可厚非。

據外媒The Atlantic調查記者考究，1967年時日本獲贈鑽石求婚戒指嘅日本女士不足半成，直至鑽石商De Beers用大量廣告進軍市場後，比例喺16年間大升11倍；類似現象亦喺90年代嘅中國出現，係市場營銷嘅教科書級示例。

雖然大家都展望年尾聖誕同出年情人節嘅「求婚季」會刺激原石市場，但連全球鑽石寡頭之一、營運125年嘅De Beers都預計，假期銷量只會一年不如一年，「人造神話」地位朝夕不保。

分析師Paul Zimnisky指出，鑽石市場主要由消費者需求主導，雖然原石價格目前下滑，但天然同人造鑽石並非「零和遊戲」。佢又相信，隨住實驗室鑽石技術成熟，供應有限嘅天然鑽石長遠仍會增值。

話雖如此，當行過香港嘅珠寶舖頭，飾品可能都無減過價。Zimnisky指，就算原石批發商減低價錢，零售商都好少喺利潤空間同價碼上讓步，只會食埋批發價水位，唔會益消費者。以美國為例，一卡拉嘅圓形鑽石比2020年初仲要貴3%。