好多人都有用Zoom開會或者見工嘅經驗，但有冇諗過你用嘅背景會影響老細或者HR對你嘅第一印象？最近有研究發現，使用沙灘、動物等新奇背景嘅人原來會被貼上唔可靠嘅標籤，咁揀咩background對你做好份工有幫助呢？
近期發佈於科學期刊《PLOS ONE》上嘅一項研究分析咗Zoom背景對第一印象嘅影響，其中一名作者、英國杜倫大學心理學副教授Paddy Ross指，視訊背景喺Zoom會議中佔據咗大半個螢幕，「所以你依家除咗要擔心自己嘅外表同思考點樣展示自己之外，仲要考慮埋自己身邊有啲咩。」
Ross同佢嘅團隊收集咗18名男性白人同18名女性白人面帶微笑同中性表情嘅相。研究人員為呢72張相加上唔同嘅背景，包括客廳、經過模糊處理嘅客廳、書櫃、放滿盆栽植物嘅櫃、空白嘅牆壁，以及瞓喺冰上嘅海象，再加上一個Zoom會議嘅視窗框架，模擬呢36個人正參加Zoom會議嘅效果，然後要求167名參加者根據相中人睇落嘅可信度同能力進行評分，最高分為7分，最低分為1分。
最高分配搭：笑容 & 書櫃背景
結果顯示，有書櫃同植物嘅照片獲得更多好評，模糊嘅客廳背景同空白牆壁嘅得分中規中矩，而客廳背景同海象圖片獲得嘅分數最低。即使係使用同樣嘅背景，有笑容嘅與會者睇落會比冇表情嘅人更可信，能力評分亦會較高。
可信度評分 
能力評分
用新奇圖片做背景或犯大忌
研究報告指，虛擬背景被視為職業形象嘅延伸，其他與會者會根據個人空間進行推理：正式嘅背景同穿著可以向其他人傳遞成熟、成功同有能力嘅信號；屋企背景同行新奇路線嘅圖片反而表達咗一種隨意、放鬆嘅態度，望落會畀人一種唔認真嘅感覺，能力亦會被低估。假如見工或者開會時別無選擇，只可以用屋企做背景，咁就唯有嘗試用微笑抵消背景帶嚟嘅負面影響喇。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
