有啲人返一份工已經返到心力交瘁，但亦有人對「多重職業」嘅斜槓生活心懷嚮往，不過一份啱心水嘅兼職唔係咁易搵，最好人工唔好太低、工作唔好太沉悶、入場門檻唔好太高……近年喺內地興起嘅「職業伴娘」就吸引咗唔少有興趣搵兼職嘅年輕女性入行！
職業伴娘喺婚禮當日未必只係做臨記、扮花瓶——經驗豐富嘅伴娘會喺婚禮前參與策劃接親儀式同遊戲，而且喺遇到突發情況時，伴娘要盡可能幫助新娘解決問題。有時職業伴娘仲要掩飾自己嘅真實身份，因為如果被其他賓客知道伴娘係租返嚟嘅，可能會認為新娘人緣唔好，或者覺得新娘屋企冇人撐腰，所以職業伴娘需要同新娘互相掩護，甚至編造一個假身份應付其他人。
兼職做伴娘唔一定係為錢
話就話係一份兼職，但以「職業伴娘」作為副業嘅年輕女性未必完全係為咗報酬入行。有職業伴娘喺網上分享自己兼職嘅心得：「其實看到有專門去當伴娘的職業，我還挺好奇的覺得蠻新奇，就嘗試去做了幾次伴娘。我覺得當伴娘真的很讚，每次看別人結婚，感覺又有一種相信愛情了的感覺。」
咁喺「陪伴經濟」崛起嘅年代，職業伴娘又有冇可能發展成一份全職工作呢？兼職做伴娘實際上可以賺到幾多錢？網上有人聲稱全職伴娘月入過萬，社交平台上流傳嘅「兼職攻略」仲講到擔任婚禮助理同職業伴娘嘅薪酬可能高達2,000人民幣，不過有職業伴娘喺小紅書上反駁相關傳聞：「如果一個陌生人，願意付好幾千的薪水請你去當伴娘，你得考慮一下誘惑背後有多大風險。其實做了這麼久，好的時候也有六百八百，但大多時候都是三、四百。」
工作門檻雖低 但有具體招聘要求
職業伴娘嘅入行門檻唔算高，情商高、性格外向、有耐性嘅人都有擔任職業伴娘嘅潛質，如果有參加婚禮同擔任伴娘嘅經驗，以及熟悉婚禮流程同地方婚禮習俗就更理想！有經驗嘅職業伴娘仲會喺求職貼文中列明自己嘅「過人之處」，例如接受素顏出鏡同「相貌普通」，強調自己會做好綠葉嘅角色，絕對唔會搶新娘風頭。
但結婚始終係人生大事，部分新娘喺物色伴娘時會列出更具體嘅要求。內地《正觀新聞》訪問咗一名喺國慶假期期間舉行婚禮嘅新娘徐寧（化名），由於佢臨近婚期都未搵到朋友做伴娘，所以需要搵兼職伴娘嚟幫手。根據徐寧嘅要求，伴娘唔可以太矮，又唔可以太高，而且八字、生肖唔可以同新娘相沖，最後佢用咗500人民幣，租到一名符合條件嘅職業伴娘。
專家：用市場化方案解決婚禮問題更有效率
首都經濟貿易大學勞動經濟學院副教授、中國新就業形態研究中心主任張成剛喺接受《中國新聞網》採訪時談及「職業伴娘」呢種新興職業：「職業伴娘伴隨著婚禮新需求出現，對應著這樣一個市場需求，產生了新的工種，我認為，這是一種勞動分工細化的表現。」張成剛指出，採用市場化方案去解決婚禮問題具有更高效率，又可以避開一啲人情問題。
不過喺婚禮呢啲人生關鍵時刻，都需要採用市場化嘅方式解決問題，張成剛感到有些悲觀，「對新娘新郎來說，肯定是希望自己最親近的人成為伴娘伴郎，但因為大家的時間都如此緊張，做伴娘伴郎的成本太高，所以在這種情況下不得已採取了市場化的解決方案。」
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
