美國一名女子喺今年暑假搵到一份心儀工作，仲不惜為咗返新工而搬屋。點知喺工作咗一星期之後，新公司嘅HR居然話從來冇錄取過佢，連原本「聘用」事主以及安排工作畀佢嘅直屬上司都試圖推卸責任。其後事主將呢段經歷分享上TikTok，希望其他求職者引以為戒。
面試後被準上司告知：想請你
24歲嘅Camryn Spina之前喺網上申請咗弗吉尼亞州某間大學嘅啦啦隊教練職位，其後佢獲安排參加一場網上面試，當時嘅面試官、亦即係Spina未來嘅直屬上司對佢嘅表現非常滿意，佢唔單止邀請咗Spina去參觀學校同參加下一場面試，仲為本來係住喺佛羅里達州嘅Spina租咗架車，方便佢揸車前往弗吉尼亞州見工。
Spina表示，呢次面試長達5個鐘，佢喺面試過程中同準上司相談甚歡。喺第二次面試結束後，佢就收到準上司嘅電郵，電郵入面除咗提到話想聘用Spina，亦列出咗工作詳情。
新公司冇提供合約 未入職已經開始做嘢
其實睇返Spina同準上司嘅電郵紀錄就會發現，對方從來冇提供過任何合約或者錄用通知書，但Spina一直都冇留意到呢個細節。
到咗7月11日，Spina再次收到準上司嘅電郵，通知佢喺8月1號開始工作，然後準上司又叫Spina聯絡新公司嘅HR辦理入職手續。佢喺電郵中表示，搵HR處理入職事宜只係一個「形式 」：「依家完成手續可能意味著你嘅工資期將於8月1日開始。」
準上司喺畀完「入職日期」後有keep住同Spina聯絡，甚至喺8月1日前已經有搵Spina幫手處理一啲行政工作。
與此同時，Spina要趕喺入職前搬去弗吉尼亞州，又要喺當地搵埋新公寓，忙到焦頭爛額，但Spina當時覺得一切都係值得嘅，因為佢係真心鍾意呢份新工作。
上司同HR各有一套招聘流程
Spina喺8月1日開始返新工，不過幾日後上司就叫佢聯絡返HR以確認佢已經完成入職程序，跟住HR回覆指佢哋仲審查緊呢個職位嘅申請。更離譜嘅係，上司喺第二日通知Spina：「你嘅背景審查出咗問題。」Spina認為呢個講法荒謬至極，因為佢連超速罰單都冇收過，而且從未被拘留，又點會有犯罪紀錄呢？Spina走去問HR，點知HR話Spina嘅工作申請從來冇進入過背景審查嘅階段。
到咗呢個時候，好明顯Spina嘅上司同HR根本冇就招聘程序達成共識。HR話佢哋會尋找更多申請者，第日如果有職位空缺會再聯絡Spina；上司就話佢之前都係咁樣請人，然後表示喺佢哋搞清楚問題之前，Spina唔應該返公司做嘢。最後HR再打畀Spina，表明唔會聘用佢。
結局：新公司報銷搬屋費用
為咗返新工而搬屋嘅Spina當然唔甘心就咁算數，畢竟佢淨係搬屋都用咗差唔多1,500美元，加上佢已經做咗7日嘢，手頭上又有上司嘅電郵紀錄，於是佢要求新公司賠償佢嘅損失，如果唔係佢將會向公司採取法律行動。
呢場求職鬧劇耗費咗Spina唔少時間同心力，好在最後公司肯報銷返Spina搬屋嘅費用，開咗一張1,600美元嘅支票畀佢。Spina喺TikTok上提醒其他求職者：「喺收到正式文件之前應該咩都唔好做住，而唔係相信份文件最後一定會到手。」
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
