唔少人會喺遇到感情問題時向屋企人、朋友求助，但你有冇諗過呢班智囊團仲可以直接幫你物色合適嘅另一半？如果你自問搵另一半嘅眼光一般，成日都要依賴一班軍師嘅意見，咁不妨試下用Tinder最新推出嘅「媒人功能」，直接邀請親友團幫手推薦最適合自己嘅有緣人，話唔定可以行少啲冤枉路！
Tinder喺星期一宣佈於美國、英國、日本等15個國家推出「媒人功能」，用戶可以邀請親友幫自己尋找合適嘅配對對象。每位用戶每日最多可以向15名軍師分享自己嘅專屬連結，收到邀請連結嘅媒人即使冇開設Tinder帳戶，都可以瀏覽相關對象嘅個人檔案，並喺24小時內選擇要唔要推薦畀當事人。
媒人可以選擇保密身份
俗語有云：「唔做中，唔做保，唔做媒人三代好」，媒人唔係咁易做，萬一推薦咗唔合適嘅對象，甚至被當事人埋怨就唔好啦。細心嘅Tinder考慮埋媒人嘅感受，媒人可以自由選擇要唔要披露真實身份；但如果媒人喺推薦時已經登入咗Tinder帳戶，當事人就會睇到推薦人嘅姓名。
無須擔心父母熱情助攻
用戶亦唔需要擔心徵詢父母意見會令擇偶過程變得尷尬，因為媒人只可以向當事人推薦合適嘅用戶檔案，唔可以代表當事人向其他人發送訊息。當事人如果唔鍾意媒人推薦嘅對象，仍然可以選擇向左滑動跳過檔案。
有咗「媒人功能」之後，Tinder用戶喺尋找真命天子/真命天女嘅過程中，可以提前預演埋見家長呢個重要步驟。唔知同父母推薦嘅對象交往，婆媳或者翁婿之間嘅關係會唔會更和諧呢？
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
