國務院喺10月25日發佈咗2024年嘅假日安排，雖然內地打工仔可以喺年初一到年初八期間連放八日假，但八日假期入面有兩日其實都係調休（將其他休息日調入新年長假），加上除夕呢個重要日子冇假放，搞到內地網民怨聲載道。
根據國務院嘅安排，內地民眾喺2024年嘅2月10日至17日（年初一到年初八）都有假放。表面上係放咗一個長假，但其實八日當中有兩日假期係屬於調休性質，即係國務院將新年前後嘅兩個星期日（2月4日及2月18日）改為上班日，再將呢兩日假期補落新年長假期。
不過比起調休，網民最接受唔到嘅係除夕居然冇假放！有網民認為除夕對中國人嚟講有辭舊迎新、闔家團圓嘅重要意義，而且內地有唔少人背井離鄉在外工作，大家都係喺除夕當日趕返屋企同家人團聚，如果2024年嘅除夕冇假放，咁可能好多打工仔會錯過同屋企人共度除夕嘅機會。
其實官方一早就考慮到大家嘅需要，雖然除夕當日冇假期，不過官方有喺公告中補充：「鼓勵各單位結合有薪年休假等制度落實，安排職工在除夕（2月9日）休息。」《環球時報》前總編輯胡錫進亦發文為官方嘅安排護航，稱交通部宣佈高速公路從年三十到年初八都免費通行，呢個安排係向社會發出「明確信號」，希望大家配合，將除夕當作假期。佢呼籲條件允許嘅機構同企業響應政府嘅信號，盡量喺年三十當日安排假期，唔好辜負國務院嘅苦心。
官方考慮得咁周到，可惜仍有網民唔收貨，有網民從傳統文化角度出發，認為國家理應將除夕定為節假日，亦有網民指出打工仔請年假並非易事，間間公司對於員工請假都有唔同限制，官方同一班「專家」未免將請年假呢件事諗得太簡單。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
