「國際金融中心地位受威脅」、「高收入人口正撤出這座城市」、「需要解決生活成本問題」……咦，呢幾句描述好似好熟口面，不過今次講緊嘅唔係香港，係紐約！最新研究顯示，當地高收入居民因住屋成本高昂及稅務負擔沉重開始搬離紐約州，高淨值人口流失令紐約州嘅金融服務業面臨重大危機。
《紐約郵報》報導，由超過3,000家公司及商會組成嘅紐約州商業委員會（Business Council of New York State）發表報告稱，隨著其他州開始搶人才、搶投資，紐約州未來嘅成功難以得到保證。「解決紐約州嘅稅務負擔、商業環境及生活成本等問題有助鞏固紐約作為全國及全球金融領導者嘅地位。」
紐約州金融行業就業機會幾乎零增長
商業委員會嘅分析指，過去三年新增最多保險及金融服務行業高薪工作嘅州份為德薩斯州、佛羅里達州、北卡羅來納州及喬治亞洲，其中北卡羅來納州喺過去三年新增咗17.8%嘅金融及保險業就業機會，但紐約州嘅增長率只得0.2%，遠低於4%嘅全國平均水平。
高稅率或加速納稅人口流失
數據顯示，紐約人口呈現持續下降趨勢，喺2019年到2022年期間下跌咗2.7%，係疫情期間人口流失最嚴重嘅州份，其中主要流失源自紐約市及其郊區，亦即係紐約州大多數最富有居民嘅居住地。
如果淨係睇2021年，紐約州流失至各州份嘅納稅人口仲多過從其他州份吸納返嚟嘅納稅人，當中紐約州人口遷往佛羅里達州所造成嘅收入損失已經高達98億美元。研究稱呢個趨勢並非巧合，美國智庫稅務基金會將紐約評為州及地方居民綜合稅率最高嘅州份，而佛羅里達州則是最低嘅州份。報告亦提到，紐約係美國少數對遺產徵收遺產稅嘅州份，遺產稅甚至被嘲笑係「死亡稅」。
報告強調，稅務因素可能喺高淨值人士遷移嘅過程中發揮關鍵作用，因為由高稅率州份遷往低稅率嘅城市會為佢哋帶來更大嘅好處。報告續指，紐約州有必要盡快解決稅務負擔、商業環境及生活成本等削弱紐約競爭力嘅問題，否則紐約喺金融及保險業嘅主導地位，甚至係紐約經濟嘅健康及繁榮都會受到威脅。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
